Србија испрати хеликоптер „Супер Пума“, 16 противпожарни возила и тим од околу 40 пожарникари-спасувачи во Шпанија, каде што ќе помогнат во справувањето со големите шумски пожари што со денови беснеат во земјата.
Од аеродромот „Никола Тесла“ во Белград беше испратен хеликоптер со петчлен екипаж и офицер за врска, како и 37 пожарникари-спасувачи и тројца припадници на тимот за медицинска поддршка.
Српскиот министер за внатрешни работи, Ивица Дачиќ, изјави дека Шпанија на 24 јули прогласила национална вонредна состојба поради пожарите, а ден подоцна побарала меѓународна помош преку Механизмот за цивилна заштита на Европската Унија.
Тој посочи дека Србија, по одлука на претседателот Александар Вучиќ, веднаш понудила помош и за Шпанија и за Франција, но засега позитивен одговор пристигнал само од шпанските власти.
Српскиот тим ќе биде ангажиран во околината на Мадрид, во градот Навалкарнеро, а хеликоптерот по пристигнувањето веднаш ќе биде вклучен во гаснењето на пожарите во најкритичните подрачја, меѓу кои се провинциите Авила, Мадрид, Толедо и Кастељон. Пожарникарите патуваат со 16 возила, едно теренско возило и две приколки.
Хеликоптерот „Ербас H215 Супер Пума“ има капацитет да носи до 4,5 тони вода и важи за едно од најмоќните летала на Хеликоптерската единица на српското Министерство за внатрешни работи за гаснење пожари. Покрај тоа, може да превезува до 22 спасувачи со целосна опрема.
Дачиќ нагласи дека Србија располага со доволно капацитети за евентуални пожари и на својата територија, посочувајќи дека еден хеликоптер „Камов“ веќе е стациониран во Ниш за побрза реакција.
Минатата недела големите шумски пожари во шпанските области Авила, Мадрид и Толедо принудија околу 90.000 луѓе да се евакуираат или да останат изолирани. Пожарот во Авила стана најголем во поновата историја на Шпанија, при што изгореа околу 50.000 хектари површина. Пожарите и натаму се активни, а силниот ветер дополнително го отежнува нивното гаснење.
