Владата на Србија донесе одлука за продолжување на привремената забрана за извоз на нафта и нафтени деривати до 2 јули 2026 година, со цел да обезбеди стабилно снабдување на домашниот пазар и да спречи евентуален недостиг и раст на цените.
Како што соопшти српската Влада, одлуката е усвоена на вонредна седница, а причината за продолжувањето на мерката се и натаму присутните глобални нарушувања на пазарот на енергенси, кои влијаат врз снабдувањето со нафта и нафтени деривати и доведуваат до намалена понуда на светските пазари.
„Оваа одлука е донесена имајќи предвид дека глобалните случувања и понатаму значително влијаат врз снабдувањето со нафта и нафтени деривати, како и врз намалената понуда“, се наведува во соопштението.
Првичната забрана беше воведена на 9 март годинава и важеше до 19 март, по што во повеќе наврати беше продолжувана. Српските власти наведуваат дека мерката има за цел заштита на домашниот пазар од можен недостиг на горива и нагли ценовни шокови предизвикани од нестабилностите на светскиот пазар.
