Србија следната недела ги поставува првите цевки за гасниот интерконектор со Македонија

Изградбата на гасниот интерконектор меѓу Србија и Македонија влегува во нова фаза, откако за следната недела е најавено поставување на првите цевки на српска територија.

Првите цевки ќе бидат поставени на делница долга околу пет километри во близина на Врањска Бања, соопшти српската министерка за рударство и енергетика во технички мандат, Дубравка Ѓедовиќ Хандановиќ, по состанокот со министрите за енергетика на Србија, Македонија, Грција и Бугарија во Белград. До крајот на октомври се очекува испорака на околу 15 километри цевки.

— реклама —

Според „СиЊуз“, вредноста на српскиот дел од проектот се проценува на околу 153 милиони евра, а интерконекторот треба да има капацитет од 1,5 милијарди кубни метри природен гас годишно.

Српските власти планираат работите на својата територија да завршат во првиот квартал од 2028 година. Трасата на српска територија ќе биде долга околу 145 километри, наведе Ѓедовиќ Хандановиќ.

— реклама —

Од македонска страна, завршувањето на делницата се очекува кон средината или до крајот на 2028 година, според информациите што ги пренесе српската министерка.

Интерконекторот меѓу Македонија и Србија треба да се поврзе со гасната врска меѓу Македонија и Грција, која веќе е во изградба. По нејзиното пуштање во употреба, Македонија треба да добие пристап до Јужниот гасен коридор и до терминалите за течен природен гас во Грција, меѓу кои Ревитуса и Александруполис.

— реклама —

На тој начин, гасот од грчките терминали преку Македонија би можел да продолжи кон Србија и понатаму кон пазарите во Централна Европа, со што би се создала дополнителна рута за снабдување на регионот.

Македонија и Србија неодамна се приклучија и кон Вертикалниот гасен коридор, иницијатива што ги поврзува гасните системи на земјите од Југоисточна и Централна Европа. Во него учествуваат и Грција, Бугарија, Романија, Молдавија, Украина, Словачка и Унгарија.

— реклама —

Министрите за енергетика на четирите земји на состанокот во Белград оцениле дека новите интерконектори, заедно со подоброто користење на постојната инфраструктура, треба да обезбедат повеќе правци и извори за снабдување со природен гас и да придонесат за поголема енергетска сигурност во регионот.

Српското Министерство за рударство и енергетика официјално потврдило дека првите цевки за интерконекторот се веќе испорачани и дека нивното поставување ќе започне наскоро.