Српскиот државјанин Љубиша Каровиќ, кој за малку ќе испаднеше од авион на „Рајанер“ поради пукање на прозорецот за време на летот, ќе поднесе тужби против три компании – „Рајанер“, „Боинг“ и „Џенерал електрик“.
Според српските медиуми, Каровиќ и неговиот правен тим, предводен од грчки адвокат, веќе ангажирале и американска адвокатска канцеларија специјализирана за авионски несреќи. Постапките против „Боинг“ и „Џенерал електрик“ ќе се водат во САД, додека сè уште не е познато каде ќе се води спорот против „Рајанер“.
Случајот сè уште е во фаза на истрага, а судската постапка не е започната. Се очекува Каровиќ да води повеќегодишна правна битка за надомест на физичката и психичката штета што ја претрпел.
Инцидентот се случи на 10 јули, кога за време на летот од Солун кон Меминген се откачи дел од моторот, кој го скрши прозорецот до седиштето на Каровиќ. Поради наглата декомпресија, тој за малку ќе беше извлечен надвор од авионот, а го спасиле безбедносниот појас и останатите патници, кои го држеле сè додека леталото принудно не слетало.
Иако повредите на рацете и рамената речиси целосно заздравеле, Каровиќ и натаму чувствува болки во вратот, а психичките последици од несреќата сè уште се изразени.
