Средните училишта во Скопје се опремуваат со современи кабинети и лаборатории, со цел наставата по природните и математичките науки да се насочи кон практична работа, експерименти и интерактивно учење.
Во тек е уредување на кабинети по математика и физика, како и лаборатории по хемија и биологија, кои ќе добијат нова наставна опрема, дидактички помагала, интерактивна технологија и училиштен мебел приспособен на современите потреби.
Со интерактивните панели учениците ќе можат сложените научни концепти да ги изучуваат преку видеа, симулации, тридимензионални модели и практични експерименти, наместо знаењето да се темели само на теорија и формули.
Дополнително, се гради и паметен пластеник кој ќе служи како училишна лабораторија каде што ќе се поврзат образованието, науката, технологијата и современото земјоделство.
Објектот ќе биде опремен со сензори и микроконтролери за следење и регулирање на температурата, влажноста на почвата, наводнувањето и прихранувањето. Дел од системите ќе можат да се следат и управуваат преку апликација за паметни уреди.
Во рамките на пластеникот ќе бидат поставени и метеоролошка и професионална агростаница. Учениците ќе можат директно да собираат и анализираат податоци за временските и почвените услови и преку практична работа да ги изучуваат современите земјоделски технологии.
Пластеникот ќе се користи во текот на целата година, а во него ќе се одгледуваат градинарски, овошни и цветни култури – од расад до целосно развиени растенија.
Целта на проектот е училишните простори да се претворат во современа средина за учење, во која учениците ќе имаат можност знаењето да го стекнуваат преку истражување, експерименти и практична работа.
