Здравствените власти уверуваат дека средствата што се користат за прскање против комарци не претставуваат опасност за населението и се во согласност со препораките на Светската здравствена организација. Министерот за здравство Сашо Клековски денеска порача дека граѓаните немаат причина за страв од препаратите што се применуваат во третманите.
Клековски објасни дека прскањето би имало најголем ефект доколку се спроведува во самрак, период кога комарците се најактивни. Сепак, поради реакциите и загриженоста на граѓаните, третманите понекогаш се вршат подоцна, по завршувањето на најголемиот дел од активностите во населените места, што може да ја намали нивната ефикасност.
„Оптималното време за прскање е самрак, кога комарците се најактивни. Сакам уште еднаш да ја уверам јавноста дека сите средства се препорачани од Светската здравствена организација и дека нема средства што се користат, а се опасни по здравјето на луѓето. Средствата што се користеле во минатото и биле потенцијално поопасни одамна не се употребуваат“, рече Клековски.
Тој ги повика граѓаните истовремено да ги применуваат и мерките за лична заштита од комарци, нагласувајќи дека стои зад квалитетот и безбедноста на препаратите што се користат.
Во однос на забелешките дека прскањето не било доволно, министерот оцени дека досегашните активности во најголем дел ги опфатиле потребните мерки.
Кога станува збор за третманот на ларвите, Клековски посочи дека се користат „Биопрен“, како и препарат на база на бактерија која го спречува нормалниот развој на ларвите. Според него, станува збор за современи средства за контрола на популацијата на комарци.
Последниот ларвициден третман во Скопје бил извршен со препарат на база на бактерија која, како што информираше Клековски, е препорачана од грчкиот Институт за јавно здравје.
Како дополнителен проблем тој го посочи недостатокот на таблети со бактерии за третирање на септички јами. Такви препарати веќе се користат во Грција, а надлежните ги разгледуваат можностите за нивно обезбедување и во Македонија.
„Во Македонија ги нема, па претпоставувам дека ќе работиме тие да станат достапни и кај нас, за граѓаните да можат да ги користат како индивидуална мерка за заштита. Ова е особено важно бидејќи голем број приградски населени места во Скопје сè уште немаат градска канализација“, додаде Клековски.
Николина Соколовска од Центарот за јавно здравје дополнително увери дека средството со кое се врши прскањето е квалитетно и безбедно и дека се произведува во Германија.
Таа објасни дека препаратот се раствора и дозира исклучиво според упатствата на производителот, поради што, како што рече, нема причина за сомнеж во неговата безбедност.
Соколовска нагласи дека покрај третманите, особено важно е да се спречи создавањето услови за размножување на комарците, пред сè во водените површини каде што се развиваат нивните ларви.
