Српски државјани со криминални досиеја задржани на аеродромот во Тиват: Наводно, нивната задача била да го обезбедат Вучиќ

Црногорската полиција спроведува безбедносни проверки на група српски државјани кои утрово пристигнале со чартер-лет од Белград на аеродромот во Тиват, во пресрет на Самитот ЕУ – Западен Балкан.

— реклама —

Од Управата на полицијата соопштија дека околу 90 лица биле издвоени за дополнителни контроли веднаш по слетувањето на авионот. Според нив, станува збор за дел од засилените безбедносни активности што се спроведуваат поради одржувањето на регионалниот самит.

— реклама —

„Во тек се проверки на лицата и на причините за нивното доаѓање и престој во Црна Гора. Согласно со законот ќе бидат преземени сите потребни мерки, вклучително и рестриктивни мерки доколку постојат законски основи“, соопшти полицијата.

Според дел од црногорските медиуми, меѓу патниците има лица кои се евидентирани како безбедносно интересни и наводно им бил забранет влез во земјата. Истите извори тврдат дека дел од нив би можеле да бидат вратени во Белград со првиот достапен лет.

— реклама —

Медиумите, повикувајќи се на полициски извори, наведуваат и дека постојат сомнежи оти групата пристигнала во Тиват со задача неформално да го обезбедува престојот на српскиот претседател Александар Вучиќ за време на самитот. Овие информации засега не се официјално потврдени од надлежните институции.

— реклама —

Полицијата информира дека авионот бил задржан на пистата додека траеле деталните проверки на патниците и најави дека јавноста дополнително ќе биде информирана за исходот од постапката.