Српски тинејџер исчезна на Триглав, спасувачите пронајдоа негови траги во снегот

Спасувачките екипи во Словенија трагаат по 19-годишен државјанин на Србија, кој исчезнал во саботата при искачување на Триглав, највисокиот врв на Јулиските Алпи. Младиот планинар тргнал по исклучително тешката патека преку Племенице, по што му се губи трагата.

— реклама —

Словенечката полиција го примила известувањето за исчезнувањето во неделата, 1 ноември, нешто пред 20 часот. Во потрагата се вклучени спасувачките служби од Бовец и Мојстрана.

— реклама —

На височина од 2.130 метри спасувачите пронашле предмети што му припаѓаат на исчезнатиот млад човек. Денеска претпладне забележале и траги од движење во снегот, кои се спуштале до околу 1.900 метри надморска височина. Таму трагите престанале, бидејќи биле избришани од силниот ветер. Во истото подрачје биле пронајдени и уште неколку негови лични предмети.

Лошите временски услови дополнително ја отежнуваат потрагата. Поради силниот ветер и облачноста, хеликоптерите не можат да полетаат, соопштиле од Полициската управа Нова Горица.

— реклама —

Патеката преку Племенице, позната и како Бамбергова патека, важи за една од најтешките обележани планинарски патеки на Триглав. Таа минува низ стрмни и изложени делови од планината, каде што снегот, мразот и силниот ветер ја зголемуваат опасноста.

— реклама —

Потрагата продолжува под раководство на Полициската станица Бовец. Засега нема информации што му се случило на 19-годишникот ниту каде се наоѓа.