Српското Министерство за одбрана за двајцата австриски јутјубери кои влегле во дел од воениот комплекс тврди дека оперативната способност на базата не е загрозена

Двајца австриски јутјубери неовластено влегле во дел од воениот комплекс во Батајница, по што против нив биле поднесени кривични пријави. Српското Министерство за одбрана соопшти дека, и покрај недозволениот влез, оперативната способност на воената база не била загрозена.

Според Министерството, јутјуберите се движеле низ физички одвоен и ограден дел од комплексот каде што не се одвиваат активности на припадниците и техниката на единиците сместени на аеродромот. Сепак, на снимката се гледа и неограден правец, кој се наоѓа на помалку од пет метри од активната писта по која се движат летала.

— реклама —

Од Министерството објаснуваат дека комплексот се протега на речиси 15 километри, а дел од него е оставен отворен поради пристап на цивилни компании кои изведуваат подготвителни работи и го уредуваат теренот за изградба на нови објекти. Се претпоставува дека станува збор за простор предвиден за сместување на борбени авиони „Рафал“.

Министерството нагласува дека авионите и хеликоптерите што се гледаат на снимката не се во оперативна употреба.

— реклама —

„Леталата, односно авионите и хеликоптерите што се гледаат на снимката, се отпишани и ниту едно од нив не е во оперативна употреба за какви било задачи на Военото воздухопловство и противвоздушната одбрана на Војската на Србија“, се наведува во соопштението.

Од Министерството додаваат дека станува збор за неовластен влез во дел од комплексот кој е одделен со ограда од активниот дел на аеродромот, поради што таму нема физичко-техничко обезбедување. Оттаму сметаат дека прикажувањето на случајот како „упад во воена база“ не ја одразува реалната состојба.

— реклама —

Сепак, Министерството потврди дека јутјуберите влегле во простор во кој движењето е забрането и потенцијално опасно, и покрај јасно истакнатите предупредувања.

Против двајцата се преземени законски мерки и се поднесени кривични пријави поради неовластен влез.

— реклама —

Министерството заклучува дека инцидентот не ја загрозил оперативната способност на единиците, додавајќи дека безбедноста на базата во Батајница е на „исклучително високо ниво“.