Основното јавно обвинителство за гонење на организиран криминал и корупција не утврдило основи за сомнение дека е сторено кривично дело при јавните набавки поврзани со изградбата на 19 модуларни болници.
По извршените проверки и анализата на целокупната прибрана документација, надлежниот јавен обвинител оценил дека нема основи за сомнение за злоупотреба на службената положба и овластување од член 353 од Кривичниот законик, ниту за друго кривично дело кое се гони по службена должност.
Предметот бил оформен на 10 септември 2021 година, со цел да се провери документацијата поврзана со набавките и да се утврди дали во нивното спроведување постојат елементи на кривично дело.
Во текот на постапката била прибрана документација од повеќе институции, меѓу кои Министерството за внатрешни работи, Министерството за финансии – Бирото за јавни набавки, Министерството за труд и социјална политика, Министерството за здравство, Владата и ОЈО Тетово. Биле анализирани јавните набавки, техничките спецификации, договорите, проектната документација и релевантните законски прописи.
Обвинителството утврдило дека во периодот од април до јуни 2020 година биле спроведени три постапки за обезбедување дополнителни капацитети на здравствениот систем за справување со пандемијата од Ковид-19. Тие се однесувале на монтажни контејнери кај Клиниката за инфективни болести во Скопје, немедицинска опрема за Регионалниот ковид-центар и формирање монтажно-модуларен амбулантско-поликлинички оддел за Клиниката за пулмологија и алергологија.
Била разгледувана и постапката за набавка на модуларни монтажни контејнери во рамките на Проектот за итно справување со Ковид-19, финансиран со заем од Светска банка. Според Обвинителството, постапката била спроведена согласно правилата на меѓународната финансиска институција, преку барање понуди на меѓународниот пазар.
Бирото за јавни набавки потврдило дека во ваков случај не се применуваат одредбите од Законот за јавните набавки, согласно законскиот исклучок за набавки што се спроведуваат според правилата на меѓународна организација.
Во рамките на проверките била анализирана и регулативата од областа на градењето. Јавниот повик бил објавен на 13 октомври 2020 година, а договорот бил склучен на 30 ноември истата година. Во меѓувреме, со измените на Законот за градење од 24 ноември 2020 година, модуларните градби наменети за здравствена дејност биле опфатени во категоријата градби за кои не е потребно одобрение за градење.
Од документацијата произлегло и дека дел од јавните здравствени установи имале решенија од Министерството за здравство за поставување на модуларните градби, како и соодветна проектна документација.
Обвинителството ја разгледувало и документацијата за активностите на Светска банка по пожарот во модуларната болница во Тетово. Во октомври 2021 година биле посетени објектите во Гостивар, Струга, Прилеп, Велес и Штип, при што била проверувана усогласеноста со проектните стандарди, безбедноста и противпожарната заштита.
Според прибраната документација, тимот на Светска банка потврдил дека постапката за набавка била спроведена согласно важечките правила на банката и дека испорачаната стока одговарала на утврдените технички спецификации.
По анализата на сите докази и извршените проверки, Обвинителството не утврдило факти што би укажале дека службено лице ја искористило или пречекорило службената положба и овластување, или не ја извршило службената должност со цел да прибави значителна имотна корист или да предизвика значителна штета.
Поради тоа, надлежниот јавен обвинител оценил дека утврдените факти не ги исполнуваат законските обележја на кривичното дело „Злоупотреба на службената положба и овластување“, по што е констатирано дека нема основи за сомнение за кривично дело кое се гони по службена должност и нема место за натамошно јавнообвинителско постапување по предметот.
