Што добива Иран, а што САД? Детали од меморандумот што треба да биде потпишан во петок

Меморандумот за разбирање што Техеран и Вашингтон треба да го потпишат во петок во Швајцарија предвидува отворање на Ормутскиот теснец, постепено деблокирање на иранските пристаништа, олеснување на санкциите за иранската нафта и прекин на сите воени активности, вклучително и во Либан, објави Ројтерс.

Пакистанскиот премиер Шехбаз Шариф соопшти дека двете страни прогласиле итен и траен прекин на сите воени операции, додека заменик-шефот на иранската дипломатија Казем Гарибабади најави дека меморандумот ќе биде официјално објавен по потпишувањето.

— реклама —

Според договореното, Ормутскиот теснец ќе биде отворен за комерцијален поморски сообраќај, а американските мерки што се однесуваат на блокадата на иранските пристаништа ќе почнат да се укинуваат веднаш по ставањето на потписите. Иранската агенција Фарс објави дека Техеран, во координација со Оман, ќе учествува во управувањето со поморскиот сообраќај низ теснецот.

Иран и САД најавија дека преговорите за посложените прашања, меѓу кои и иранската нуклеарна програма и американските санкции, ќе продолжат во наредните 60 дена. Техеран повторно уверува дека нема да произведува ниту да набавува нуклеарно оружје, а ирански претставници велат дека земјата е подготвена привремено да ги замрзне нуклеарните активности и да не го проширува капацитетот на своите постројки.

— реклама —

Иранските власти тврдат дека САД се согласиле да не воведуваат нови санкции за време на преговорите, како и привремено да ги олеснат ограничувањата за извоз на иранска нафта. Според Техеран, во иднина би следело и постепено укинување на американските и санкциите на Обединетите нации, во согласност со договорен распоред.

Воедно, ирански претставници наведуваат дека Вашингтон прифатил да се ослободи дел од замрзнатата иранска имотна вредност од околу 25 милијарди долари, иако американскиот претседател Доналд Трамп изјави дека Иран нема да добие директни готовински исплати.

— реклама —

Договорот, според најавите, треба да влијае и врз состојбата во Либан. Шариф посочи дека прекинот на воените операции се однесува и на конфликтот меѓу Израел и Хезболах. Иранскиот министер за надворешни работи Абас Аракчи побара целосен прекин на израелските напади врз Либан, оценувајќи дека САД имаат одговорност за спроведување на договореното.

Либанскиот претседател Џозеф Аун изрази надеж дека постигнатиот договор ќе придонесе за трајно запирање на конфликтот и ќе отвори пат кон стабилност, обнова и закрепнување на земјата.

— реклама —

Од друга страна, израелскиот министер за одбрана Израел Кац порача дека израелските сили ќе останат во безбедносните зони во Либан, Сирија и Појасот Газа, нагласувајќи дека безбедносните интереси на Израел нема да бидат доведени во прашање.

Претставник на Хезболах, пак, изјави за Ројтерс дека организацијата не презела воени активности по објавувањето на договорот и дека ќе го почитува прекинот на огнот доколку и Израел постапува на ист начин.