Што се случува во мозокот кога сме во несвесна состојба?

Мозокот продолжува да обработува јазик и звуци дури и кога телото е под анестезија и лицето е во несвесна состојба, покажува ново истражување објавено во списанието Nature, пренесува Euro News.

— реклама —

Научниците утврдиле дека одредени делови од мозокот остануваат активни и можат да препознаваат и обработуваат говор, и покрај тоа што пациентот е без свест. Според истражувачите, невронските мрежи продолжуваат да реагираат на надворешни стимули.

— реклама —

„Нашите наоди покажуваат дека мозокот е значително поактивен и поспособен за време на несвесна состојба отколку што се мислеше досега“, изјави коавторот на студијата Самиер Шет. Тој додаде дека мозокот и под целосна анестезија продолжува да го анализира околниот свет.

Истражувањето било спроведено врз седум пациенти кои биле подложени на операција за епилепсија. Со помош на специјални Neuropixels сонди, научниците следеле како мозокот реагира на звук и говор без присуство на свест.

— реклама —

Во експериментите било утврдено дека мозокот реагира на звуци во реално време, ги препознава зборовите и дури покажува способност за предвидување на следните зборови врз основа на контекстот.

Според научниците, овие резултати укажуваат дека процеси кои се сметаа за поврзани исклучиво со будна состојба можат да се одвиваат и кога човекот е во несвесна состојба, но потребни се дополнителни истражувања за целосно разбирање на оваа појава.