Стојаноски до Тренчевска: Многу подобро се живее денес отколку кога вие ја водевте државата, тоа го потврдуваат сите економските показатели

Пратеникот од ВМРО-ДПМНЕ Бојан Стојаноски на денешната собраниска седница ја спореди економската состојба во првите две години од мандатот на актуелната власт со периодот кога со државата раководеше СДС, при што оцени дека денес се живее подобро.

— реклама —

Стојаноски се осврна на актуелната инфлација, која според денешните податоци изнесува 2,7 отсто, како и на растот на градежништвото и бруто домашниот производ. Тој нагласи дека, иако има уште работа, економските показатели, според него, покажуваат подобри резултати во споредба со периодот на претходната власт.

„Никој од нас не кажува дека во државава се живее сјајно. Ние викаме дека имаме уште работа, но исто така никој не може да ни го одземе фактот и аргументите дека многу подобро се живее во моментов, отколку кога вие ја водевте државата“, изјави Стојаноски.

— реклама —

Тој направи споредба и на растот на минималната и просечната плата во првите две години од владеењето на СДС и ВМРО-ДПМНЕ. Според податоците што ги презентираше, минималната плата за време на првите две години од власта на СДС пораснала за 2.427 денари, додека во првите две години на ВМРО-ДПМНЕ зголемувањето изнесувало 3.479 денари, односно 1.052 денари повеќе.

— реклама —

Во однос на просечната нето-плата, Стојаноски посочи дека во првите две години од владеењето на СДС таа се зголемила за 2.397 денари, додека во првите две години на ВМРО-ДПМНЕ пораснала за 7.538 денари, што според него е разлика од 5.141 денар.

Пратеникот ја спореди и динамиката на растот на пензиите. Како што наведе, во првите две години на СДС просечната исплатена пензија пораснала за 540 денари, додека во првите две години на ВМРО-ДПМНЕ зголемувањето изнесувало 6.805 денари, односно 6.265 денари повеќе.

— реклама —

„Ова се бројките и ова се резултатите“, заклучи Стојаноски.