Пратеникот од ВМРО-ДПМНЕ, Мартин Стојановски, на денешната седница на Комисијата за финансирање и буџет оцени дека предложениот ребаланс на Буџетот за 2026 година создава услови за продолжување на економскиот раст, зачувување на финансиската стабилност и подобрување на животниот стандард на граѓаните.
Стојановски истакна дека и покрај глобалните економски предизвици, како што се геополитичките тензии, нестабилноста на меѓународните пазари и растот на инфлацијата, македонската економија покажува отпорност.
„Во првиот квартал од 2026 година бруто домашниот производ оствари реален раст од 3,1 проценти, а проекцијата за целата година е 3,5 проценти. Особено е важно што овој раст не се темели само на еден сектор“, рече Стојановски.
Тој нагласи дека раст е забележан во услужните дејности, градежништвото и земјоделството, при што градежниот сектор, според него, повторно е еден од главните двигатели на економијата благодарение на капиталните инвестиции, изградбата на патишта, комуналната инфраструктура и енергетските проекти.
Според Стојановски, позитивни показатели има и кај животниот стандард, каде што приватната потрошувачка бележи раст од 2,6 проценти, просечната нето-плата во првите четири месеци е повисока за 7,8 проценти, а пензиите се зголемени за 11,8 проценти.
Тој посочи дека позитивни резултати се забележуваат и во финансискиот сектор и надворешната трговија, наведувајќи дека корпоративните кредити, извозот и странските директни инвестиции бележат раст.
„Ребалансот што денес го разгледуваме е насочен кон задржување на макроекономската стабилност, но и забрзување на економскиот раст. Главен носител на растот ќе бидат инвестициите, пред сè преку капиталните вложувања, инфраструктурните проекти и поддршката на општините“, изјави Стојановски.
Тој оцени дека предложениот ребаланс е развоен, реален и одговорен и ќе овозможи продолжување на инвестициите во патишта, училишта, градинки, инфраструктура и отворање нови работни места.
Во своето обраќање, Стојановски упати критики и кон опозицијата, оценувајќи дека актуелните економски политики даваат резултати и дека граѓаните ќе ја препознаат разликата во однос на претходниот период.
