(Видео) „Стоп за фемицидот“ – мирен протест во Богданци по трагичната смрт на Билјана

Жители на Богданци, Гевгелија и околните населени места вечерва се собраа во Градскиот парк во Богданци на мирен протест во спомен на 17-годишната Билјана Кириќ, која беше убиена пред три дена.

— реклама —

Со запалени свеќи, положено цвеќе и транспаренти со пораките „Стоп за фемицидот“, „Гласни против насилството“ и „Молкот е соучесништво, одбивам да молчам!!!“, присутните повикаа на прекинување на насилството врз жените и поголема одговорност од институциите. На собирот беа и соученици, пријатели и сограѓани на девојката.

View this post on Instagram

— реклама —

Една од главните пораки на протестот беше дека насилството не смее да се премолчува, особено кога претходно биле пријавени закани или случаи на насилство.

— реклама —

Според досега објавените информации, Билјана на 30 септември пријавила физичко насилство од својот 21-годишен партнер, а на 16 октомври биле изречени привремени мерки за заштита, меѓу кои и забрана за приближување. Сепак, на 3 ноември таа била пронајдена мртва во опожарено возило, додека во негова близина било пронајдено и телото на нејзиниот партнер. Според првичните информации од Обвинителството, станува збор за убиство и самоубиство, а истрагата продолжува.

Со протестот, граѓаните побараа да се испита дали институциите ги презеле сите потребни мерки за заштита на девојката по претходната пријава за насилство. Тие порачаа дека борбата против насилството врз жените не смее да се сведе само на реакции по трагични настани.

— реклама —

Во меѓувреме, за недела, 8 ноември, во 12 часот, во паркот „Жена Борец“ во Скопје е најавен протест под мотото „Ниту една повеќе“. Организаторите бараат целосна истрага за случајот со Билјана, утврдување на евентуалните институционални пропусти и поефикасна заштита на жените и девојките.