По зголемената појава на западнонилската треска во земјава, Агенцијата за храна и ветеринарство (АХВ) во последните денови добила стотина пријави од граѓани за угинати птици. Надлежните апелираат на внимателност, но истовремено посочуваат дека појавата на една угината птица во урбана средина не треба да предизвикува паника.
Пријавите пристигнуваат преку бесплатната телефонска линија, електронската адреса и другите канали за комуникација на АХВ. Од Агенцијата особено нагласуваат дека поголемо внимание е потребно доколку на исто подрачје и во краток период се забележат повеќе угинати гаврани или други диви птици.
Во таков случај граѓаните треба да го пријават настанот до надлежните служби, но да не ги допираат или преместуваат угинатите птици.
„Агенцијата за храна и ветеринарство континуирано ја следи состојбата и, согласно проценката на ризикот, ги презема потребните мерки за надзор, земање примероци и лабораториски испитувања“, велат од АХВ.
Апелот следува откако надлежните институции во понеделникот посочија дека гавраните се меѓу најчесто идентификуваните резервоари на западнонилската треска, поради што секоја забележана угината дива птица треба да биде пријавена.
Министерот за здравство Сашо Клековски исто така ги повика граѓаните да пријават доколку забележат угината дива птица, особено гавран.
„Најчести резервоари на западнонилската треска се гавраните. Имаме апел за пасивно пријавување, односно сите граѓани кои ќе најдат мртва дива птица, гавран или која било друга птица, да ја пријават во Агенцијата за храна и ветеринарство. Мора да бараме кои се можните резервоари на болеста“, изјави Клековски.
Покрај следењето на состојбата кај птиците, институциите ги засилуваат и контролите на присуството на комарци. Граѓаните се повикуваат да ги почитуваат мерките за лична заштита од убоди, особено во места каде што има застоена вода во дворовите или во нивна близина.
Во повеќе скопски општини се спроведуваат засилени мерки за прскање против комарци, а се врши и ларвицидно третирање на водни површини. Дополнително, ларвицидна теренска дезинсекција на стоечки води е извршена во Сингелиќ, Стајковци и Јурумлари.
Државниот санитарен и здравствен инспекторат ќе спроведе вонредни контроли, при што во наредниот период фокусот ќе биде ставен на прскањето од земја. Општините во кои е прогласена епидемија ќе добиваат СМС-пораки со насоки за постапување, подготвени од Институтот за јавно здравје.
Август и септември се периодот кога, според епидемиолошките очекувања, традиционално се бележи најголем ризик од ширење на западнонилската треска.
Во Македонија досега се потврдени 35 случаи на западнонилска треска, при што се регистрирани четири смртни случаи. На Клиниката за инфективни болести се хоспитализирани 20 пациенти, од кои 18 се лабораториски потврдени случаи, додека двајца се водат како клинички суспектни.
Пет пациенти со потешка клиничка слика се на интензивна нега, додека 15 лица досега се излекувани и се отпуштени од Клиниката.
Загрижува и податокот дека возраста на заболените се намалува. Најмладиот хоспитализиран пациент има 25 години.
