(Видео) Страшно невреме во Шпанија: Две лица загинаа, едно се води како исчезнато

Во силното невреме што ја погоди Каталонија загинаа две лица, а по едно лице се трага. Обилните дождови предизвикаа поплави во подрачјата во близина на Барселона, додека невремето во текот на неделата се преместува кон север, кон провинцијата Жирона.

Едно лице загинало во Тордера по уривање на ѕид во камп, додека друго се удавило во поплавена гаража во Монтмелос дел Ваљес. Двете места се наоѓаат во провинцијата Барселона.

— реклама —

Поради опасност од поплави е издадено предупредување за Жирона, особено за подрачјата меѓу Барселона и француската граница. Жителите во близина на реките Ридаура и Даро се повикани да не ги напуштаат домовите откако реките се излеале.

— реклама —

„Потврдени се две смртно настрадани лица и најмалку едно исчезнато“, изјави командантот на каталонската противпожарна служба Дејвид Борељ.

Спасувачките екипи во текот на ноќта интервенирале на повеќе места, меѓу другото и за извлекување луѓе заробени во возила на поплавени патишта. Во неколку места во околината на Барселона наврнале повеќе од 200 литри дожд на квадратен метар.

Шпанскиот премиер Педро Санчез оцени дека состојбата во Каталонија и натаму е „многу сложена“ и ги повика граѓаните да избегнуваат патувања што не се неопходни и да ги следат упатствата на службите за итни случаи.

— реклама —

Обилни дождови и невреме во текот на викендот зафатија и други делови од источна Шпанија и Кастиља-Ла Манча, каде што во саботата загина 102-годишна жена.

Шпанската метеоролошка служба соопшти дека невремето во поширокото подрачје на Барселона почнало да слабее во неделата околу пладне, а системот се преместува кон север.

Научниците предупредуваат дека климатските промени придонесуваат за засилување на медитеранските невремиња, кои се вообичаени за источна Шпанија во есен. Потоплото море овозможува поголемо испарување, што може да доведе до екстремно обилни врнежи.