Најмалку седум лица загинаа, а уште две се здобиле со тешки повреди во тешка сообраќајна несреќа што утринава се случила на автопатот М1 во западна Унгарија, соопштија унгарските власти.
Според првичните информации, патнички минибус со молдавски регистарски таблички со голема брзина удрил во камион кој бил запрен во колона на автопатот. Сообраќајот на овој патен правец претходно бил целосно блокиран поради друга фатална несреќа, во која товарен камион се судрил со градежно возило, при што едно лице го загубило животот.
Во минибусот се превезувале девет лица. Унгарската полиција за порталот „24.hu“ потврди дека сите седум загинати се мажи и дека станува збор за странски државјани. Двајца патници кои ја преживеале несреќата биле итно пренесени во болница, каде што лекарите се борат за нивните животи.
На местото на трагедијата интервенирале бројни противпожарни и медицински екипи, кои со часови работеле на извлекување на настраданите од уништениот минибус.
За несреќата се огласи и унгарскиот политичар Петер Маѓар, кој изрази сочувство до семејствата на жртвите и потврди дека загинатите не биле унгарски државјани.
Полицијата продолжува со увидот за да ги утврди точните околности под кои дошло до оваа голема трагедија, која повторно ја отвори дебатата за безбедноста во услови на застој и навремено предупредување на возачите на автопатиштата.
