Екстремните горештини, сушата и зголемената потрошувачка предизвикаа сериозен притисок врз енергетските пазари во регионот, со нагло зголемување на берзанските цени на електричната енергија.
На 3 август околу 20 часот, цената на струјата во Србија достигна околу 550 евра за мегават-час. Во Словенија беше регистрирана цена од 717 евра, а во Хрватска околу 650 евра. Во Романија цената достигна околу 535 евра, додека во Унгарија околу 510 евра.
За споредба, Македонија и Бугарија во истиот период имаа значително пониски цени – околу 217, односно 290 евра за мегават-час.
Еден од главните фактори е екстремната суша, која ги намалува водостоите на Дунав и другите реки. Тоа го отежнува производството во хидроцентралите, но создава проблеми и за термоелектраните и нуклеарните централи, кои користат речна вода за ладење.
Последиците веќе се чувствуваат во Романија, каде што еден реактор во нуклеарната централа „Чернавода“ е исклучен поради нискиот водостој на Дунав. Постои ризик да биде погоден и вториот реактор. Централата обезбедува околу една петтина од електричната енергија во земјата.
Притисокот е присутен и во Србија, каде што ниските водостои го отежнуваат производството од хидроцентралите, поради што властите апелираат за рационална потрошувачка.
Цените особено растат во вечерните часови. Тогаш потрошувачката останува висока поради климатизацијата, додека производството од соларните електрани нагло опаѓа по заоѓањето на Сонцето. Резултатот е помала понуда во момент кога побарувачката е висока.
Енергетските експерти како долгорочни решенија ги посочуваат зголемувањето на производните капацитети, батериското складирање, подобрите прекугранични врски и пофлексибилното управување со потрошувачката.
Сушата и високите температури покажуваат дека пред енергетските системи не стои само прашањето колку електрична енергија можат да произведат, туку и дали можат да обезбедат доволно струја токму во периодите кога побарувачката е најголема.
