Студентите од државните универзитети од август ќе имаат можност активно да се вклучат во работата на општините преку новата програма „Месеци на практикантство“, најави претседателот на Унијата на млади сили на ВМРО-ДПМНЕ, Тодор Конески на денешната прес-конференција.
Тој посочи дека програмата ќе се реализира во текот на август и септември, како резултат на соработката меѓу Министерството за локална самоуправа и Агенцијата за иновации, научно-технолошки развој и претприемништво – ИНОВА, во партнерство со државните универзитети.
Според Конески, целта е младите да го применат стекнатото академско знаење во пракса, работејќи директно во локалните самоуправи, но и да придонесат со нови идеи за подобрување на административните услуги и локалниот развој.
Тој нагласи дека Агенцијата ИНОВА ќе го координира вклучувањето на студентите, додека Министерството за локална самоуправа, преку Ресурсниот центар за поддршка на општините и воспоставената соработка со државните универзитети, ќе ја организира практичната работа согласно потребите на општинските администрации.
Конески истакна дека, покрај практикантството, преку грант-програмите на ИНОВА ќе се обезбедува финансиска поддршка за стартап компании, иновативни бизниси и претприемачи кои ќе понудат конкретни решенија за локалните предизвици.
Според него, ваквиот пристап ќе придонесе за поголемо поврзување на локалната самоуправа, академската заедница, иновативниот сектор и бизнис-заедницата, со цел младите да добијат повеќе можности за професионален развој и да ја градат својата иднина во Македонија.
