Шведскиот крал Карл Шеснаесетти Густав и кралицата Силвија се позитивни на Ковид-19, потврдија денеска од кралската палата.
„Кралот и кралицата, кои се целосно вакцинирани со три дози, имаат благи симптоми и се чувствуваат добро“, се вели во соопштението на палатата.
Кралската палата во Стокхолм објави и дека кралот (75) и кралицата (78) се во самоизолација и дека се работи на пронаоѓање на луѓето со кои биле во контакт.
Шведска постави дневен рекорд по бројот на нови инфекции со коронавирус, бидејќи на 30 декември регистрираше 11.507 случаи, а претходниот рекорд од 11.376 случаи беше на крајот на декември 2020 година.
Новиот бран, делумно предизвикан од позаразната варијанта на вирусот, омикрон, во последниве недели доведе до нагло зголемување на бројот на случаи и хоспитализации, објави Ројтерс.
