Светската економија ќе порасне за 3,1 отсто, војната и енергетските цени ја зголемуваат неизвесноста

Светската економија во 2026 година би можела да оствари раст од 3,1 процент, што е за 0,1 процентен поен повеќе од претходната прогноза на Меѓународниот монетарен фонд (ММФ). И покрај подобрените очекувања, предвидениот раст е послаб во споредба со минатогодишните 3,5 проценти.

— реклама —

Во најновиот извештај за светските економски изгледи, претставен на состанокот на ММФ и Светската банка во Бангкок, Фондот предупредува дека војната на Блискиот Исток, растот на цените на енергенсите и зголемениот јавен долг претставуваат сериозна закана за глобалната економија.

Една од главните причини за поддршка на економската активност се инвестициите во вештачката интелигенција. Сепак, придобивките од нив не се распределуваат подеднакво меѓу државите. Според процените на ММФ, 95 проценти од глобалниот економски раст ќе потекнуваат од само 32 земји, додека во април се очекуваше во тој удел да учествуваат 54 држави.

— реклама —

За американската економија се предвидува раст од 2,3 проценти во 2026 година, додека Кина би остварила раст од 4,5 проценти. Кај развиените економии, стапката на раст се очекува да достигне 2,1 процент, малку повеќе од двата процента забележани во 2025 година.

— реклама —

Истовремено, економиите во развој се соочуваат со поголеми предизвици поради нивната чувствителност на промените во цените на нафтата и природниот гас. За овие земји ММФ предвидува забавување на растот на 3,7 проценти во 2026 година, од 4,5 проценти минатата година.

Од Фондот предупредуваат дека продолжен конфликт на Блискиот Исток, прекини во снабдувањето со енергенси и дополнително зголемување на трошоците за задолжување би можеле уште повеќе да ги влошат економските услови.

Поради овие ризици, ММФ ги повикува државите да работат на зајакнување на јавните финансии и да создадат поголема економска отпорност за полесно справување со идните кризи.