Светските реки во 2025 година забележале една од најсушните години во последните неколку децении, а истовремено продолжува и падот на копнените резерви на вода. На ова предупредува Светската метеоролошка организација (СМО), која оценува дека ваквиот тренд може да има сериозни последици врз идното снабдување со вода.
Според извештајот за состојбата со глобалните водни ресурси, резервите на копнена вода, меѓу кои се подземните води, езерата, вегетацијата, мразот и снегот, се намалуваат веќе една деценија.
Генералната секретарка на СМО, Селест Сауло, предупреди дека светот веќе ги користи резервите на вода како „заштеда“, бидејќи глобалните копнени резерви покажуваат надолен тренд уште од периодот 2014–2016 година.
Податоците покажуваат дека во повеќе од една третина од речните сливови во светот протокот на вода бил под нормалното ниво. Според СМО, 2025 година е меѓу најсушните години за реките на глобално ниво откако се собираат податоци, односно во последните 35 години.
Сепак, состојбата не е иста во сите региони. Во делови од Јужна Азија, на пример, бил забележан вишок вода. СМО оценува дека ваквите големи разлики се показател за сè понестабилни и понепредвидливи водни циклуси.
Дополнително, во текот на 2025 година е регистрирано широко распространето губење на ледниците во сите региони. Тоа е четврта последователна година со ваков тренд, а според извештајот, продолжувањето на загубата на ледот ќе создава долгорочна неизвесност во снабдувањето со вода.
