Американската војска во најновиот бран воздушни напади врз Иран погодила два танкери во сопственост на иранската влада, објави „Акиос“, повикувајќи се на американски официјални лица. Нападите се случиле во вторникот вечерта, а според американските извори, биле погодени околу 100 цели.
Ова е првпат американските сили да нападнат ирански танкери како одмазда за иранските напади врз бродови во Ормускиот Теснец, а не со цел да спречат кршење на поморската блокада.
Неименуван американски претставник за „Акиос“ изјавил дека потегот е дел од новата политика „танкер за танкер“, одобрена од претседателот Доналд Трамп, чија цел е да го одврати Иран од понатамошни напади врз танкери што минуваат низ Ормускиот Теснец.
Иранските државни танкери биле закотвени во близина на иранскиот брег, северно од линијата на американската поморска блокада. Американски беспилотни летала истрелале ракети што ги погодиле машинските оддели на танкерите.
Меѓу останатите цели биле позиции на противвоздушната одбрана на Иранската револуционерна гарда, радарски системи, капацитети за поставување поморски мини, комуникациски центри, како и лансери за противбродски крстосувачки ракети и беспилотни летала.
Американските претставници тврдат дека иранскиот обид за одмазда не успеал. Иран истрелал околу 25 балистички ракети, но само половина од нив стигнале до воздушниот простор на Јордан. Десет биле пресретнати, додека три паднале на земја без да предизвикаат човечки жртви.
Иранските сили лансирале и околу 20 беспилотни летала кон американските бази во Бахреин, но повеќето биле соборени. Балистички ракети и беспилотни летала биле насочени и кон американски бази во Кувајт, додека две беспилотни летала биле испратени кон база во Ербил, во ирачки Курдистан, но и тие биле пресретнати.
Белата куќа и Централната команда на САД соопштија дека нападите се директен одговор на неодамнешните обиди на Иранската револуционерна гарда да нападне трговски бродови во Ормускиот Теснец, како и на нападите врз американските бази во регионот.
Според американски претставници, нападите се дел и од поширока стратегија на администрацијата на Трамп за спречување на Иран повторно да ги изгради радарските и ракетните системи потребни за напади врз бродови во Теснецот. Еден американски претставник ја опишал стратегијата како „косење трева“, со цел постојано да се намалуваат иранските напаѓачки способности.
Американската страна тврди дека последниот бран напади значително ги ослабнал иранските капацитети во Теснецот и дека на трговските бродови им обезбедил најмалку еден месец со намалено ниво на закана.
Во меѓувреме, американските сили продолжиле да спроведуваат бродови низ Ормускиот Теснец. Според американски претставник, во вторникот без проблеми поминале околу 40 бродови што превезувале милиони барели нафта. Американските сили притоа пресретнале неколку противбродски крстосувачки ракети и беспилотни летала истрелани од Иранската револуционерна гарда кон конвојот. Ниту еден брод не бил погоден.
Двете страни имаат спротивставени тврдења и за цивилните жртви. Иранските државни медиуми објавија дека американска ракета погодила свадбена прослава во градот Кухестак, при што, според нивните наводи, загинале најмалку четири лица, а 35 биле повредени.
Портпаролот на Централната команда на САД, капетан Тим Хокинс, ги отфрли овие тврдења.
„Запознаени сме со извештаите што потекнуваат од иранските државни медиуми. Американската војска никогаш не гаѓа цивили, за разлика од Иранската револуционерна гарда“, изјавил Хокинс.
Висок американски претставник оценил дека САД во овој круг на конфликтот целосно ја надвладеале иранската страна.
„Иранците не само што ја загубија контролата врз Ормускиот Теснец, туку ја загубија и контролата врз самиот конфликт. Денес не постигнаа ништо“, изјавил претставникот.
