Телефонски разговор меѓу Путин и Трамп, тема биле Украина и Иран

Рускиот претседател Владимир Путин и американскиот претседател Доналд Трамп телефонски разговарале за актуелните меѓународни прашања, меѓу кои војната во Украина, состојбата на Блискиот Исток и можностите за идна соработка меѓу Русија и САД, соопшти Кремљ.

Според помошникот на рускиот претседател, Јуриј Ушаков, разговорот бил инициран од американската страна, траел еден час и 25 минути и, како што наведе, поминал во деловна и конструктивна атмосфера.

— реклама —

На почетокот на разговорот Путин му го честитал Денот на независноста на Трамп и на американскиот народ.

— реклама —

Една од главните теми била војната во Украина. Според Кремљ, Путин повторил дека Русија е подготвена за политичко и дипломатско решавање на конфликтот, но со почитување на руските интереси. Од друга страна, Трамп ја истакнал својата подготвеност да придонесе за што побрз прекин на борбите и изнаоѓање мировно решение, со ангажман на своите специјални претставници.

Двајцата лидери разговарале и за можностите за подобрување на руско-американските односи по завршувањето на конфликтот во Украина, при што Трамп оценил дека постои значителен потенцијал за развој на билатералната соработка.

— реклама —

Во разговорот било посветено внимание и на состојбата на Блискиот Исток. Путин изразил надеж дека преговорите меѓу САД и Иран ќе доведат до долгорочно и заемно прифатливо решение, а истовремено ја потврдил подготвеноста на Русија да помогне во стабилизирањето на регионот.

— реклама —

Според Кремљ, Путин повторно го поканил Трамп да ја посети Русија, а двајцата претседатели се согласиле наскоро повторно да разговараат.

Ова бил четвртиот телефонски разговор меѓу Путин и Трамп од почетокот на годината и вкупно 14-ти од враќањето на Трамп во Белата куќа во 2025 година.