Температури до 23 степени, снег само на Шапка

Сончево и релативно топло време денеска ќе се задржи низ земјава, со максимални температури кои достигнаа до 23 степени, покажуваат податоците на Управа за хидрометеоролошки работи.

— реклама —

Највисока температура од 23 степени е измерена во Гевгелија, додека 22 степени се регистрирани во Демир Капија, Велес, Кавадарци, Струмица и Скопје – Петровец. Во Скопје – Зајчев Рид се измерени 21 степен, а 20 степени во Битола, Тетово, Виница и Штип.

Пониски температури се измерени во планинските и повисоките места – 8 степени на Попова Шапка, каде има и најголема снежна покривка од 62 сантиметри, 12 во Крушево, 13 во Маврови Анови и 14 во Лазарополе.

— реклама —

До крајот на денот времето ќе остане стабилно, со мала до умерена облачност и слаб до умерен ветер од северозападен правец.

— реклама —

Утре се очекува претежно сончево и топло време, со минимални температури од 0 до 9 степени, додека дневните ќе се искачат од 19 до 25 степени. Во Скопје се очекува температура до 25 степени со слаб северен ветер.

Според прогнозата, стабилното и топло време ќе се задржи до средината на следната седмица, по што следува промена. Во среда се најавува засилен до силен ветер, особено долж Повардарието, каде налетите може да надминат 70 километри на час, како и услови за краткотраен дожд во западните делови.

Во четврток времето ќе биде променливо облачно, а кон крајот на неделата се очекуваат пообилни врнежи, особено во сабота, кога се најавува и поизразена нестабилност.