Тензии во Полска: Масовни протести пред Уставниот суд, полицијата распореди дополнителни сили

Голем број граѓани вчера се собраа пред седиштето на Уставниот суд на Полска во Варшава. Демонстрантите носат полски знамиња и извикуваат пароли како „Ова е Полска“, додека полицијата го засили своето присуство за да го обезбеди собирот.

Според пишувањата на полските медиуми, меѓу насобраните преовладуваат повозрасни лица, а поради зголемувањето на бројот на демонстранти, полицијата распоредила дополнителни сили пред зградата на судот и на влезот во комплексот.

— реклама —

Улицата Алеја Шуха е затворена за сообраќај, пренесува ТВП.

Протестите следуваат откако во петокот на веб-страницата на Уставниот суд беше објавено дека се суспендирани претседателот на судот, Богдан Швјенчковски, и потпретседателот Бартломеј Сохањски. По ова, раководењето со судот го презеде судијката Ана Корвин-Пјетровска.

— реклама —

Во петокот дошло до обид за насилно влегување во комплексот на судот, при што полицијата привела четири лица. Тројца се осомничени за неовластено влегување во објектот на институцијата, додека четвртото лице било приведено поради навредување полициски службеник.

Нов инцидент се случил вчера наутро околу 11 часот, кога 30-годишен маж нападнал една од организаторките на протестот, откако таа го повикала да ја симне фантомката, соопшти полицијата.

— реклама —

При апсењето кај него биле пронајдени нож, гасен пиштол, значка со натпис „Security“, која наликува на полициска значка, како и наркотични супстанции.

Поради кризата, полскиот претседател Карол Навроцки го прекинал патувањето во Сенегал и се вратил во земјата, каде што одржал консултации со претставници на политичките партии за можно решение на спорот.

Разговорите биле одржани денеска во претседателската палата, а меѓу учесниците биле претставници на партијата „Полска 2050“ и Полската народна партија.