Терапијата за мултиплекс склероза ќе биде достапна во регионалните болници, 83 отсто од пациентите ќе се лекуваат поблиску до домот

Пациентите со мултиплекс склероза ќе можат да ја добиваат терапијата во регионалните болници, без да мора секој месец да патуваат до Скопје. Министерството за здравство ги објави протоколите за дисперзирање на терапијата, со кои се предвидува лекувањето да биде подостапно за пациентите од повеќе општини.

Протоколите беа претставени во присуство на директорите на Универзитетската клиника за неврологија, Специјалната болница за ортопедија и трауматологија „Св. Еразмо“ во Охрид, ГОБ „8 Септември“ во Скопје и Клиничката болница во Штип.

На Клиниката за неврологија се евидентирани околу 2.000 пациенти со мултиплекс склероза, од кои приближно 1.800 активно се лекуваат. Бројот на новодијагностицирани пациенти расте, а само во 2025 година биле регистрирани 115 нови случаи.

— реклама —

Во моментов, 835 пациенти од 48 општини примаат имуномодулаторна терапија опфатена со дисперзијата, но досега лековите ги подигаат или ги примаат на Клиниката во Скопје. Од нив, 491 пациент живее надвор од скопскиот регион, па многумина мораат да патуваат секој месец, често во придружба на друго лице. Тоа им создава дополнителни финансиски трошоци, отсуства од работа и физички напор поради хроничната болест.

Министерот за здравство, Сашо Клековски, посочи дека децентрализацијата ќе овозможи да се опслужат повеќе пациенти, без Клиниката за неврологија да стане тесно грло. Тој информираше дека буџетот за лекови за мултиплекс склероза годинава изнесува рекордни 451 милион денари.

„Ова е модел. Тоа е олеснување за пациентите, кои терапијата ќе ја добиваат поблиску до својот дом, но и унапредување за здравствените работници во регионалните болници, чиј делокруг на работа се збогатува. Секако, ова е модел и за други области, како онкологијата“, изјави Клековски.

— реклама —

Директорот на Универзитетската клиника за неврологија, Јован Божиновски, истакна дека иницијативата е одговор на долгогодишните барања на Здружението за борба против мултиплекс склероза.

Според него, правилникот ги утврдува лековите, надлежностите, условите што треба да ги исполнуваат центрите и постапката за спроведување на терапијата, додека со протоколот секоја болница ги презема конкретните обврски.

Болниците треба да определат одговорен невролог, фармацевт и обучени медицински сестри, да обезбедат соодветно чување и издавање на лековите, да ја евидентираат секоја доза и да ги пријавуваат несаканите реакции во рок од 24 часа.

Клиниката за неврологија ја задржува стручната, финансиската и организациската одговорност. Таа ќе ги набавува лековите, преку Комисијата за имуномодулаторна терапија ќе одлучува за секој пациент, ќе ја фактурира терапијата кон Фондот за здравствено осигурување и ќе врши надзор во регионалните центри најмалку еднаш годишно.

— реклама —

Дисперзијата опфаќа десет лекови, поделени во две групи. Во првата се лековите што пациентите самостојно ги применуваат, меѓу кои се интерфероните, глатирамер ацетат и оралните лекови: диметил фумарат, терифлуномид и кладрибин. Тие ќе се подигаат еднаш месечно од болничката аптека во регионалниот центар.

Втората група ја сочинуваат биолошките лекови окрелизумаб, натализумаб и офатумумаб, во поткожна форма, кои ќе ги аплицира медицинско лице во центарот.

Терапијата првично ќе се воведува на Клиниката за неврологија, каде што пациентот ќе ја прими првата доза, ќе помине обука и ќе потпише согласност. Сите наредни дози ќе ги прима во регионалниот центар, а контролите ќе се вршат на секои шест или 12 месеци, со дигитален конзилиум.

Во првата фаза, Клиничката болница во Штип ќе ги опслужува пациентите од источниот, југоисточниот и вардарскиот регион, односно околу 128 пациенти. Специјалната болница „Св. Еразмо“ во Охрид ќе ги опфати југозападниот регион и Битола, со околу 146 пациенти, додека ГОБ „8 Септември“ во Скопје ќе ја преземе грижата за 344 пациенти од главниот град.

На овој начин, вкупно 618 пациенти, односно 74 отсто од опфатените, ќе можат да ја добиваат терапијата во регионален центар. Заедно со пациентите од граничните општини, кои самостојно ќе изберат каде ќе се лекуваат, бројот може да достигне 692 пациенти, односно 83 отсто.

Преминот кон регионалните центри е доброволен. Пациентите ќе бидат префрлени дури откако ќе потпишат писмена согласност, а оние што нема да сакаат да ја променат установата ќе продолжат да ја добиваат терапијата на Клиниката за неврологија, без никакви последици врз нивното право на лекување.