Ниво на терористичка закана во Обединето Кралство денеска е подигнато од „значајно“ на „сериозно“, што значи дека напад е „многу веројатен во следните шест месеци“, соопшти Заедничкиот центар за анализа на тероризмот.
Како што се наведува, одлуката е донесена по напад со нож во лондонската населба Голдерс Грин, но и поради поширок пораст на закани од исламистички и екстремно десничарски тероризам, кои доаѓаат од поединци и помали групи во земјата.
Министерката за внатрешни работи Шабана Махмуд изјави дека вчерашниот напад бил „гнасен чин на антисемитски тероризам“ и најави дека владата ќе преземе мерки за заштита на еврејската заедница.
Таа додаде дека ќе бидат зголемени финансиските средства за безбедност, вклучувајќи дополнителни 25 милиони фунти за полиција и заштита на синагоги, училишта и заеднички центри, при што вкупната сума оваа година ќе достигне 58 милиони фунти.
Британскиот премиер Кир Стармер изјави дека државата ќе ги употреби сите средства во борбата против антисемитизмот и за заштита на еврејската заедница.
Полицијата соопшти дека осомничениот за нападот претходно бил дел од програма за спречување на екстремизам, која подоцна била затворена.
Терористичкото ниво во Обединетото Кралство последен пат било на ова ниво во 2021 година.
