Tesla повлече одредени примероци од Model 3 и Model Y во САД поради проблем со предните светла, чиј интензитет ги надминува дозволените граници. Пресилните кратки светла можат да ги заслепат возачите од спротивната насока и да ја намалат видливоста, со што се зголемува ризикот од сообраќајна незгода.
Повлекувањето опфаќа 1.614 примероци на Model 3, произведени од јули 2017 до декември 2023 година, како и 18.735 возила Model Y, произведени од февруари 2020 до декември 2023 година.
Проблемот е поврзан со предните светла произведени од компанијата Marelli Automotive Lighting. Од Tesla објаснуваат дека интензитетот на светлото во надворешните горни агли ги надминува дозволените вредности.
Tesla за потенцијалниот проблем дознала во јануари 2024 година, неколку месеци откако канадската регулаторна агенција Transport Canada утврдила дека кратките светла на Model 3 од 2019 година не ги исполнуваат локалните стандарди.
Компанијата првиот повик за повлекување поради овој проблем го објавила во март 2024 година, а потоа побарала исклучок од американската агенција NHTSA. Tesla сметала дека недостатокот нема значително влијание врз безбедноста, но барањето било одбиено пред околу три недели.
Поголемиот дел од возилата опфатени со најновото повлекување биле дел и од првичниот повик од 2024 година. Списокот подоцна бил проширен за уште 432 автомобили, откако било утврдено дека неусогласените светла биле вградувани во сервисите подолг период од првично проценетиот.
Tesla сè уште работи на решение за проблемот.
