Тетовец измамен за 6.800 евра при купување „Ауди А5“ преку германска интернет-страница

26-годишник од тетовско пријавил дека бил измамен за вкупно 6.800 евра при обид да купи автомобил преку германска интернет-страница за продажба на возила.

— реклама —

Според пријавата во МВР, на 26 октомври забележал оглас за автомобил „Ауди А5“, по што преку пријател кој престојува во Германија стапил во контакт со наводниот продавач, 46-годишниот Ј.Л. од Германија. Двајцата се договориле за купопродажна цена од 8.000 евра.

— реклама —

Купувачот најпрво уплатил 800 евра како капар, а откако добил фотографија од наводен договор за купопродажба, на 29 октомври преку банкарска сметка уплатил дополнителни 6.000 евра.

— реклама —

Сомнежите за измама се појавиле кога ангажираната шлеп-служба пристигнала на адресата во Германија за да го преземе автомобилот, но утврдила дека лицето не живее таму и дека адресата е лажна.

— реклама —

Случајот бил пријавен во СВР на 10 ноември, а полицијата презема мерки за негово расчистување.