Иран денеска соопшти дека единствено Техеран ќе биде задолжен за отстранување на мините од Ормускиот теснец, повикувајќи се на Меморандумот за разбирање постигнат меѓу Иран и Соединетите Американски Држави во Исламабад.
Заменик-министерот за надворешни работи на Иран, Казем Гарибабади, преку платформата Икс му одговори на францускиот претседател Емануел Макрон, предупредувајќи дека ситуацијата во регионот е „чувствителна и сложена“.
„Силно ја советуваме Франција дополнително да не ја комплицира ситуацијата со своите провокации“, напиша Гарибабади.
Реакцијата на Техеран следува откако Макрон соопшти дека Франција и Оман соработуваат на намалување на тензиите на Блискиот Исток и дека, заедно со партнерите, ќе работат на отстранување на мините од Ормускиот теснец.
По средбата во Париз, францускиот претседател и султанот на Оман, Хајтам бин Тарек, во заедничко соопштение истакнаа дека се согласиле да спроведат заеднички операции за деминирање и ја потврдија својата посветеност на слободната пловидба низ Ормускиот теснец.
„Двајцата шефови на држави ја нагласија важноста од повторното отворање на Ормускиот теснец и ја потврдија својата заложба за слободна пловидба, без услови и ограничувања, во согласност со меѓународното поморско право“, се наведува во соопштението.
Ормускиот теснец е еден од најважните светски поморски коридори за транспорт на нафта и гас, а секое нарушување на пловидбата во овој регион има значително влијание врз глобалните енергетски пазари.
