Иранските власти повторно соопштија дека Ормускиот теснец е целосно затворен за пловидба, додека американската страна остро ги демантираше таквите тврдења, оценувајќи дека поморскиот сообраќај во реалноста продолжува да се одвива.
Новоформираната Управа за теснеците на Персискиот Залив (PGSA), тело што Техеран го формираше со цел регулирање на пловидбата низ овој стратешки важен морски премин, соопшти дека теснецот ќе остане затворен „до понатамошно“.
„Со оглед на тензиите предизвикани од американските агресорски сили и последните соопштенија на иранските вооружени сили, Ормускиот теснец ќе биде затворен до ново известување“, објави агенцијата, повикувајќи ги бродските компании да ги следат понатамошните инструкции.
Од друга страна, американската војска соопшти дека информациите за целосна блокада се неточни и дека теснецот останува отворен за пловидба.
Ормускиот теснец, низ кој во мирнодопски услови поминува околу една петтина од светските испораки на нафта и природен гас, во последните месеци се претвори во една од најчувствителните точки на конфликтот меѓу САД и Иран.
Техеран ја обвинува администрацијата во Вашингтон за ескалацијата на кризата, додека САД тврдат дека преземаат мерки за обезбедување слободна пловидба и заштита на меѓународните трговски рути.
Спротивставените информации околу состојбата во Ормускиот теснец дополнително ја зголемуваат неизвесноста на глобалните енергетски пазари и стравувањата од нови потреси врз светската економија.
