Личните писма што Натали Харп, блиска соработничка на американскиот претседател Доналд Трамп, му ги испраќала во 2023 година се објавени во целост, откривајќи необично близок и емотивен однос меѓу двајцата.
Во едно од писмата Харп му напишала на Трамп: „Ти си сè што ми е важно. Никогаш не сакам да те разочарам“, додека во друго признала дека ѝ недостигаат периодите кога тој ѝ се јавувал и разговарале за различни теми, а не само за работа.
Писмата биле напишани за време или по патувањата на Трамп во Шкотска и Ирска во 2023 година, кога Харп имала 31 година, а Трамп 76. Две од писмата стигнале до новинарот и автор Мајкл Волф, кој ги користел во подготовката на својата книга „All or Nothing“ за кампањата на Трамп во 2024 година.
Харп во едно од писмата изразила и љубомора кон жените чија работа, како што напишала, се состои во тоа да разговараат со Трамп и да изгледаат добро.
„Ја сакам таа работа“, напишала таа, додавајќи дека не сака нивната комуникација постојано да се сведува на работни теми.
Нејзината блискост со Трамп особено се најде во центарот на вниманието откако беше објавено дека таа била меѓу малкуте луѓе кои го придружувале претседателот при тајното напуштање на „Air Force One“ во Турција. Според објавените информации, Трамп наводно се префрлил во камион за достава на храна, додека потоа продолжил со таен авион поради наводна закана од Иран.
Харп во тимот на Трамп е позната и по прекарот „човек-печатач“, бидејќи на претседателот редовно му печатела позитивни медиумски написи и извештаи. Таа има годишна плата од 150.000 долари и се смета за една од лицата кои имаат значително влијание врз пристапот до Трамп.
Според Мајкл Волф, писмата до него стигнале од извори во кампањата на Трамп кои биле загрижени поради блискоста меѓу претседателот и Харп.
„Ова не е вид на однос што треба да постои во професионална средина“, изјавил Волф.
Белата куќа, пак, ја брани Харп и ја опишува како една од најлојалните и највредните соработнички на Трамп.
Во едно од писмата Харп му се извинила на Трамп поради ситуација за време на патувањето во Шкотска, стравувајќи дека го разочарала.
„Гледам дека паѓам во твоите очи и го губам твоето добро мислење“, напишала таа, додавајќи дека не сака никогаш да му донесе „ништо друго освен радост“.
Харп, која претходно била водителка на конзервативната телевизиска мрежа OAN, се зближила со Трамп по нејзиното појавување на „Fox News“ во 2019 година. Таа тогаш зборувала за закон што Трамп го потпишал и за кој тврдела дека ѝ помогнал во лекувањето од рак на коските. Подоцна учествувала во неговата претседателска кампања, а во 2022 година директно се приклучила кон неговиот тим.
Во писмата Харп зборува и за лични трагедии и за ветувањето што, според неа, Трамп ѝ го дал по смртта на нејзиниот татко во 2020 година.
„Ти благодарам што секогаш си тука за мене. Никогаш нема да го заборавам моментот кога ми го даде тоа ветување откако го загубив татко ми“, напишала таа.
Нејзиниот брат претходно јавно ја обвинил дека има нездрава опсесија со Трамп, што дополнително го привлече вниманието кон природата на нивниот однос.
