Компаниите во технолошко-индустриските развојни зони (ТИРЗ) бележат стабилен раст и во уплатите кон државниот буџет и во делот на платите на вработените, изјави директорот на Дирекцијата за ТИРЗ, Гоце Димовски.
Според податоците, во 2024 година компаниите во зоните уплатиле околу 5,7 милијарди денари во буџетот, додека државната поддршка изнесувала околу 2 милијарди денари. Во 2025 година уплатите пораснале и надминале 6,3 милијарди денари, а државната помош се намалила на околу 1 милијарда денари.
Димовски истакна дека засега нема индиции за повлекување на компании од зоните, иако во одредени случаи се јавува обврска за враќање на државна помош доколку не се испочитуваат договорните услови.
Во однос на платите, тој посочи дека во 2025 година има зголемување од околу 6 проценти на нето платите во споредба со претходната година, додека бројот на вработени останува стабилен на околу 18.000 лица.
Од Дирекцијата очекуваат позитивниот тренд да продолжи и во наредниот период, со најави за нови инвестиции, отворање нови работни места и понатамошен раст на платите во зоните.
