тирз

Јован Деспотовски осомничен дека како директор на ТИРЗ направил злоупотреби - објавени детали

Основното јавно обвинителство Скопје, постапувајќи по пријава од Управата за финансиска полиција, оформи предмет и поведе постапка против 8 лица поради основано сомневање дека како соизвршители сториле кривично дело – Злоупотреба на службената положба и овластување по член 353 став 4 во врска со став 1 од Кривичниот законик.Во текот на предистражната постапка која Управата за финансиска полиција ја водеше во координација и под раководство надлежниот јавен обвинител, се обезбедија докази дека во временскиот период 26.01-12.07.2022 година, првиот осомничен како службено лице – директор на Дирекцијата за технолошки индустриски развојни зони во Скопје, заедно со три службени лица задолжени за спроведување на управната контрола при Бирото за јавни набавки и уште четири лица од Државната комисија за жалби по јавни набавки, со неизвршување на нивната службена положба, му овозможиле на едно правно лице да прибави противправна имотна корист која надминува значителна вредност од 622.981.190 денари.Првиот осомничен, по претходно донесена одлука, објавил оглас за јавна набавка за изградба на основна внатрешна инфраструктура за ТИРЗ Штип и ТИРЗ Струмица. На објавениот оглас во предвидениот законски рок се јавиле два заинтересирани економски оператори кои доставиле понуди со предвидените критериуми. Една од компаниите понудила повисока цена, но драстично пократок рок на изведба на работите во календарски денови, врз основа на што таа била избрана за изведувач.Трите лица од Бирото за јавни набавки – Комисија за вршење управна контрола, не извршиле контрола на исполнетоста на условите од тендерската документација по однос на техничката и професионална способност за изведување на предвидените работи, како и по однос на рокот на изведба на работите како критериум за квалитет. Тие не ги увиделе неправилностите и до Дирекцијата за технолошки индустриски развојни зони Скопје, доставиле записник од извршена управна контрола со дадено мислење дека договорниот орган може да продолжи со постапката за јавна набавка.Вториот учесник во постапката поднел жалба до Државната комисија за жалби по јавни набавки, но таму претседателот и три члена го игнорирале доставениот стручен наод и мислење од вешто лице од областа на градежништвото кој бил основа за жалбените наводи, па донеле решение со кое жалбата на другиот економски оператор ја одбиле поради неоснованост. На тој начин Дирекцијата склучила договор со избраната фирма за изградба на основна внатрешна инфраструктура за ТИРЗ Штип и ТИРЗ Струмица со рок на изведба од 120 календарски дена од моментот на воведување во работа.Два месеца по почетокот на работите, осомничениот директор потпишал анекс-договор со кој ја зголемил вредноста на основниот договор за 84.688.628 денари или 19,77% од основниот договор и дополнително го продолжил првичниот рок за изведба на работите. По три месеци тој потпишал и втор анекс-договор со кој ја зголемил вредноста на основниот договор за дополнителни 34.921.240 денари и уште еднаш го продолжил рокот за изведба на работите.Кога фирмата не го испочитувала дадениот рок од 120 календарски дена за изведба, кој бил најважен услов за добивање на зделката, осомничениот директор не презел службени дејствија во насока на раскинување на Договорот за јавна набавка, активирање на доставените банкарски гаранции и наплата на договорна казна преку пенали за доцнењето при изведбата.Со неизвршување на нивната службена должност, осомничените придонеле правното лице да ја добие јавната набавка врз основа на нереално низок понуден рок за изведба кој фирмата не успеала да го реализира, а со значително повисока цена од нејзиниот конкурент, па на тој начин тие за правното лице прибавиле противправна имотна корист.Имајќи ги предвид известувањата од финансиските институции за моменталната финансиската состојба според кои правното лице застапувано од неговиот управител е краен корисник на противправната имотна корист прибавена со стореното кривично дело, надлежниот јавен обвинител до Основниот кривичен суд Скопје достави барање за привремено одземање на имот и предмети заради нивно обезбедување со цел идна конфискација.Со мерката, Основното јавно обвинителство Скопје предлага замрзнување – хипотека на недвижен имот во Карпош и Кисела Вода, забрана за располагање со средства од четири трансакциски сметки (три на физичко и една на правно лице), како и забрана за располагање со список подвижен имот во сопственост на правното лице (две патнички, осум товарни возила, кипери и градежна опрема).Освен ова, по предлог на јавниот обвинител, Судот му го одзеде пасошот на осомничениот кој во моментот на сторување на делото ја извршувал функцијата директор на Дирекцијата за технолошки индустриски развојни зони Скопје.

Македонија | пред 11 месец

Директорот на ТИРЗ Димовски во официјална посета на Текнопанел

Во склоп на серијата посети на фирми кои работат во технолошко индустриските развојни зони, а со цел директна комуникација и поддршка на компаниите, директорот на ТИРЗ, Гоце Димовски ја посети фабриката на Текнопанел во Скопје.Фабриката, која е во завршна фаза на изградба, наскоро ќе започне со целосна работа, што претставува значаен чекор кон економскиот развој отворајќи нови работни места.Текнопанел е реномирана компанија, основана со цел да обезбеди висококвалитетни панели и изолациони материјали за градежната индустрија. Со своите иновативни решенија и современи технологии, компанијата е предводник во индустријата, овозможувајќи одржлив развој и ефикасност на градежните проекти низ светот.„Горди сме што компанија како Текнопанел ја избра Македонија за својата нова инвестиција, која всушност е и прва инвестиција надвор од Турција. Новата влада како клучни приоритети ги постави економскиот раст, новите работни места и привлекувањето нови инвестиции. Овие приоритети ќе останат главен двигател на нашата работа. ТИРЗ и понатаму ќе ги поддржува инвестициите кои носат долгорочни придобивки за нашата земја.“ - изјави директорот на ТИРЗ, Гоце Димовски.„Географската положба на Македонија, како и целокупната поддршка од тимот на ТИРЗ беа клучни за оваа инвестиција. Искрено се надеваме на понатамошна соработка. Уверени сме дека заедничките напори ќе резултираат со успех и долгорочен развој.“ - истакна Орхан Кахвеџи, генерален директор на Текнопанел.Посетата на фабриката на Текнопанел во Скопје, претставува уште еден доказ за посветеноста на ТИРЗ во поддршката на инвеститорите и обезбедувањето на поволни услови за инвестирање. Со новите проекти и иницијативи, Македонија продолжува да биде атрактивна дестинација за странски инвестиции и технолошки развој.

Македонија | пред 1 година

Деспотовски поднесе оставка од функцијата директор на ТИРЗ

Јован Деспотовски денеска поднесе оставка од функцијата директор на ТИРЗ.Деспотовски на брифгнгот ги соопшти бројките од се што е сработено во ТИРЗ за време на неговиот мандат.,,Немав никаков притисок од политичкиот опонент. Имам мандат до декември, но има нова политичка реалност. Ова што кулминираше деновиве, бара мој целосен ангажман.”,рече Деспотовски на брифинг со новинарите.

Македонија | пред 1 година

Нема фотографија

Деспотовски: Да ги платиме нашите луѓе повеќе за да останат дома

“Справувањето со недостигот на работна сила на Западниот Балкан бара рационален и храбар пристап. Треба прво да видиме што може да се направи во регионот со постоечките ресурси, а не да одиме во потрага по работна сила. Потребено ни е преструктурирање на економијата, инвестирање во технологија и индустрии кои носат поголема додадена вредност и подобро платени работни места,“ изјави Јован Деспотовски, директор на ТИРЗ на Балканскиот форум кој се одржува во Будимпешта. Деспотовски, на покана на Унгарскиот институт за надворешни работи, како главен говорник на панелот посветен на справувањето со недостаток на работна сила во Централна и Југоисточна Европа истакна дека за решавање на ова актуелно прашање многу е важно работите да се гледаат и анализираат преку квантитативен и структурен пристап за да се изнајдат ефективни решенија.„Разликата во продуктивноста меѓу земјите во регионот, што е потврдено и преку статистиките за продуктивност и удел во БДП по глава на жител, отвора критични прашања во врска со ефикасноста на работната сила и секторската дистрибуција. Споредбата на продуктивноста на Словенија со Македонија, Србија и Албанија открива остри контрасти. И покрај сличната големини на населението, Словенија покажува значително повисоки нивоа на продуктивност. Овде се поставува прашањето зошто ист број луѓе во Словенија произведуваат 5 пати повеќе отколку во Македонија или зошто истото производство во Србија се генерира со 3,5 пати повеќе луѓе отколку во Словенија?, “ рече Деспотовски. Според него со оптимизација на сектори и трансфер на работници може да се случи потребната промена, како на пример со трансфер на работници од земјоделие, традиционалните ниско платени производствени дејности, како и од јавната администрација во сектори потребни на пазарот на работна сила.Во справувањето со недостигот на работна сила, странските работници се појавуваат како брзо решение за ублажување на моменталните притисоци, смета Деспотовски, но според него од клучно значење е при ангажирање странска работна сила да се земат в предвид и културната компатибилност, владеењето на јазиците и приспособливоста заедно со техничките вештини.„Концептот за слободно движење на работната сила во Македонија, Србија и Албанија во рамки на Отворен Балкан има добар потенцијал да ги раздвижи пазарите на работна сила и да поттикне економски раст. Дозволувајќи поголема синергија меѓу овие земји, можеме да ја забрзаме нивната заедничка развојна линија и да го затвориме јазот којшто го имаме во однос на понапредните економии. Со поттикнување на редефинирање на секторите, разумно прифаќање на странската работна сила и користење на регионалната соработка, можеме да го отвориме патот за одржлив економски раст и просперитет низ Западен Балкан,“ посочи Деспотовски.На панелот учествуваа претставници на германската Бизнис асоцијација за Југоисточна Европа, виенскиот Институт за економски студии како и професори од Економскиот факултет во Белград и унгарската Фондација за економски истражувања.Над 100 експерти, политичари и претставници на невладини организации учествуваат на Балкански форум во Будимпешта 2024, во организација на Унгарскиот институт за надворешни работи. Меѓу нив годинава се и министерот за надворешни работи на Унгарија Петер Сијарто, Дубравка Џедовиќ, министерка за рударство и енергетика на Србија, Весела Чернева заменик директор на Европскиот Совет за надворешни односи и Игли Хасани, министер за Европа и надворешни работи на Албанија. Дводневниот форум годинава се фокусира на енергетиката, економијата и на евроинтеграцијата на Западен Балкан. Балканскиот форум се одржува осма година по ред.

Македонија | пред 1 година

ТИРЗ: Изградба на две нови фотонапонски централи во ТИРЗ Струмица и Струга

Во ТИРЗ Струмица и ТИРЗ Струга ќе се градат две фотонапонски централи со вкупна моќност од близу 8MW. Двете централи ќе се градат во рамки на јавно-приватно партнерство со турската компанија Фидес Електрик енерџи, избрана на јавен повик. Јавниот повик беше отворен на крајот на ноември 2023г. во постапка согласно Законот за јавни набавки, во траење од 45 дена, под исти услови за домашни и странски компании.Во рамки на повикот беа доставени две понуди. Една од избраната компанија, како и една од израелско – кинески конзорциум. Турската компанија ќе треба да изгради фотонапонски електроцентрали во двете зони со вкупна моќност од близу 8 MW. Согласно доставената понуда и спроведената аукција 10% од приходите остварени од производството на електричната енергија компанијата е обврзана да ги уплаќа во државниот Буџет.Договорот за јавно приватно партнерство се склучува на 25 години. По истекот на овој период, приватниот партнер е обврзан да ја пренесе сопственоста на фотонапонските централи на државата со 80% производствен капацитет. Земјиштето останува сопственост на државата. Приватниот партнер ќе плаќа и годишна такса за земјиштето (наем) од 40 денари за м2.Со овие инвестиции, ТИРЗ има за цел да придонесе кон зајакнување на енергетските капацитети на државата, како и на забрзување на транзицијата кон економија базирана на зелена енергија што е глобален тренд. Токму пристапот до енергија од обновливи извори е барање односно приоритет за повеќето од странските компании кои работат односно имаат интерес да инвестираат во С.Македонија. Со фотонапонските централи директно се придонесува кон зголемување на атрактивноста за инвестирање во земјата.До крајот на месец март ќе се објави и нов повик за јавно приватно партнерство за изградба на фотонапонски централи, за која цел се определени над 40 хектари земјиште во ТИРЗ Скопје, Штип и Прилеп. Станува збор за земјиште што не е погодно за вршење на друга дејност (индустрија) односно гранични парцели кои стојат неискористени над 15 години, а кои со оваа постапка ќе се стават во функција и ќе носат значителни приходи на државата. Јавниот повик ќе биде под исти услови како и успешно завршениот за ТИРЗ Струга и Струмица, подеднакво отворен за домашни и странски компании.

Македонија | пред 1 година

Ниту 1 денар јавни пари не се исплатени кон компанијата која најави дека ќе произведува автомобили, па ја снема, тврди ТИРЗ

„Дирекцијата за ТИРЗ остро реагира на наводите за злоупотреба на јавни средства за проектот е.Го. Ниту 1 денар јавни пари не се исплатени кон оваа компанија. Покажавме дека имаме јасни процедури и капацитет да го заштитиме јавниот интерес и средства“, велат од ТИРЗ и додаваат:Политичката партија ВМРО ДПМНЕ денес фрли јавен сомнеж врз процедурите и капацитетите за реализација на државната помош, кои засегаат не само еден туку над 40 договори што ги спроведува Дирекцијата за ТИРЗ. Со ова, се прави непосреден удар не само врз угледот на компаниите корисници на ТИРЗ, туку и врз животниот стандард на близу 20.000 наши сограѓани кои се директно ангажирани во овие компании.Во интерес веднаш да се расчисти со овие сомнежи и обвинувања и намалување на штетата врз луѓето и овие компании, јавно ја покануваме политичката партија ВМРО ДПМНЕ веднаш и без одлагање да дојде и да направи увид во целокупната документација на проектот и да најде макар 1 денар јавни пари исплатени на компанијата.Доколку се утврди дека вакви средства не се исплатени, очекуваме политичката партија да упати јавно извинување за нарушен углед до сите компании што користат поддршка од државата, а вработуваат близу 20.000 наши сограѓани и кои, само во 2023 година, уплатиле најмалку 75 милиони евра обврски кон Буџетот на државата.Дирекцијата за ТИРЗ во целиот изминат период навремено и транспарентно ја информира јавноста за сите прашања поврзани со проектот за електрични возила е.Го во Тетово.Конкретно, при самото потпишување на договорот презентирани се сите детали за поддршката од државата, а целосен увид во договорот е даден на сите заинтересирани медиуми кои се обратија до Дирекцијата. Во ниту еден момент од наша страна не е одбиен или пренасочен кон друга институција одговор на прашања поврзани со проектот. Ова, иако Дирекцијата за ТИРЗ е еден дел од повеќе останати институции, кои истотака имаат свое место и улога во реализација на проектот.Имајќи го предвид предходното, ставовите изнесени во соопштението на политичката партија ВМРО ДПМНЕ за некакво криење на договорот и нетранспаретност ги сметаме за остаток на матрица на однесување на институциите од едно минато време.

Македонија | пред 1 година

Нема фотографија

Битиќи: Македонија е посакувана дестинација за јапонските и други светски инвеститори

Денешниот ден е еден чекор напред кон унапредување на нашите билатерални односи со Јапонија, бидејќи претставници на водечки јапонски компании се дојдени за да ја запознаат нашата земја и можностите за развој на нивните бизниси кои нашата држава ги нуди, изјави заменик претседателот на Владата, задолжен за економски прашања, координација на економските ресори и инвестиции, Фатмир Битиќи, по потпишувањето на Меморандум за соработка помеѓу Дирекцијата за технолошки индустриски развојни зони (ТИРЗ) и Јапонската организација за надворешна трговија (ЏЕТРО), што се одржа денес Клубот на пратеници во Скопје.Вицепремиерот Битиќи посочи дека во текот на изминатите три децении, Северна Македонија и Јапонија одржуваа пријателски односи, но постои простор за нивно унапредување во делот на економската соработка.„Сакаме да ја надминеме географската оддалеченост и да создадеме посилни економски врски. Ги претставивме можностите за инвестирање кои ги нудиме согласно законската регулатива, од финансиска поддршка за отворање на работни места и капитални инвестиции до поддршка за истражување и развој“, рече вицепремиерот Битиќи.Тој посочи дека географската локација на Северна Македонија и нејзината близина до Европската Унија дава стратешки предности во делот на привлекувањето на нови странски инвестиции.„Нашата држава е со стратешка локација, близина и пристап до единствениот пазар на ЕУ, а нашата легислатива е во голема мера усогласена со онаа на Европската Унија, на тоа во последниве неколку години засилено се работеше и се работи. Северна Македонија е посакувана дестинација како за јапонските, така и за други светски инвеститори. 2022 година беше година со рекордни странски инвестиции од 753,8 милиони евра, година на пост ковид кризата. Тоа е доволен показател за зрелоста на нашата економија и бизнис опкружување“, рече вицепремиерот Битиќи.Вицепремиерот Битиќи нагласи дека Северна Македонија не е повеќе земја на евтина работна сила, туку на странските инвеститори нуди високо квалификувани работници со достоинствени плати.„Од друга страна пак, заштитени се и нашите граѓани, нашите работници, нашиот највреден капитал, човечкиот капитал. Бидејќи оваа држава од 2017 наваму веќе не е земја на евтина работна сила, туку земја на високо квалификувана, добро платена и конкурентна работна сила“, рече Битиќи.Меморандумот го потпишаа директорот на Дирекцијата на ТИРЗ, Јован Деспотовски и директорот на ЏЕТРО од Виена, Татсуо Камино. Потпишувањето се направи во месец кога се одбележуваат 30 години од воспоставувањето на дипломатските односи меѓу Јапонија и Северна Македонија.

Македонија | пред 1 година

Нема фотографија

ТИРЗ и јапонски ЏЕТРО потпишаа Меморандум за соработка

Дирекцијата за технолошки индустриски развојни зони (ТИРЗ) и Јапонската организација за надворешна трговија (ЏЕТРО), денеска во Скопје потпишаа Меморандум за соработка чија цел е полесен влез на јапонски компании во земјава како и воспоставување поблиска соработка меѓу македонските и јапонските компании особено во делот на заеднички проекти во градежништвото и иновациите.„Ова е почеток на една многу важна соработка. Очекувам дека во следниве денови јапонската делегација во која има и претставници на големи јапонски компании ќе ги препознаат потенцијалите за соработка. Особено е важно што еден од столбовите на Меморандумот што го потпишавме денеска е можноста за заедничка соработка на македонски и јапонски компании во проектите за обнова на Украина. Тоа што имавме можност летоска при посетата на Јапонија да го разбереме е дека има сериозен интерес посебно од големите јапонски банки да ги финансираат овие проекти кои очекуваме дека набрзо ќе се случат по завршувањето на конфликтот така што еден од фокусот на посетата е токму тоа – разговор меѓу македонските и јапонските компании како да се искористи нашето искуство и нашата блискост на овие пазари и нашите компании заедно со јапонските компании да добијат дел од тој колач на реконструкција“, изјави директорот на Дирекцијата на ТИРЗ Јован Деспотовски.„Идејата на оваа посета беше да им се овозможи на јапонските компании да се запознаат со менталитетот во Северна Македонија, деловните активности и да се воспостават деловни врски меѓу јапонските и македонските компании. Во последните неколку години ЏЕТРО интензивно работи на воспоставување на деловни врски посебно во областа на иновациите. Се надеваме дека со оваа посета ќе се воспостави и потесна врска меѓу јапонските и стартап компаниите во Северна Македонија“, рече директорот на ЏЕТРО од Виена, Татсуо Камино.Вицепремиерот задолжен за економски прашања и инвестиции, Фатмир Битиќи кој исто така ги презентираше можностите за инвестиции во земјата ја нагласи важноста на Јапонија како наш стратешки партнер.„Денешниот ден е еден чекор напред кон унапредување на нашите билатерални односи со Јапонија, бидејќи претставници на водечки јапонски компании се дојдени за да ја запознаат нашата земја и можностите за развој на нивните бизниси кои нашата држава ги нуди. Во текот на изминатите три децении, нашите земји одржуваа пријателски односи, но сакаме да ја надминеме географската оддалеченост и да создадеме посилни економски врски. Ги претставивме можностите за инвестирање кои ги нудиме согласно законската регулатива, од финансиска поддршка за отворање на работни места и капитални инвестиции до поддршка за истражување и развој“, посочи Битиќи.ТИРЗ е домаќин на јапонската делегација предводена од генералниот директор на јапонското Министерство за економија, трговија и индустрија Такехико Матсуо и директорот на ЏЕТРО од Виена, Татсуо Камино, а во чиј состав се и претставници од 11 познати јапонски компании. Во следните три дена тие ќе имаат средби со студенти од ФИНКИ, со претставници на старап компании кои се дел од програмите на Фондот за иновации и технолошки развој, како и со претставници на големи компании кои се дел од Стопанската комора на Македонија.Генералниот директор на МЕТИ, Матсуо нагласи дека „Јапонија работи на зајакнување на билатерални односи во рамките на Иницијативата за соработка за Западен Балкан, иницирана од поранешниот премиер Абе. Во посетата на бизнис делегацијата гледа „ голем чекор кон натамошно зајакнување на економските односи меѓу двете земји.“„Важноста на Северна Македонија значително расте. Додека недостигот на работна сила станува се поостри во Централна и Источна Европа, Северна Македонија има изобилство на квалитетни човечки ресурси. Исто така, има одличен пристап до огромниот пазар на ЕУ и транспортен пристап до други европски земји каде веќе се наоѓаат центрите на синџирот на снабдување. Пред сè, Северна Македонија е „сигурен партнер“ со кој споделуваме фундаментални вредности“, нагласи Матсуо.И јапонскиот амбасадор во земјава, Казуја Оцука нагласи дека е многу важно двете земји да ја унапредат економската соработка и гледа голем потенцијал, особено со вакви посети каде јапонските компании можат директно да се запознаат со инвестициските можности кои ги нуди земјава.Меморандумот се потпишува во месецот кога се одбележуваат 30 години од воспоставувањето на дипломатските односи меѓу Јапонија и Северна Македонија.

Македонија | пред 1 година

Извозот од ТИРЗ над 1 милијарда евра во првите четири месеци од годинава Inbox

Во првите четири месеци од годинава извозот од Технолошко индустриските развојни зони достигна 1.1 милијарда евра и е највисок споредено со истиот период во изминативе четири години, покажува редовната месечна анализа на Дирекцијата. Само во однос на 2021 растот е за 4%, во однос на пандемиската 2020 за 74%, додека споредено со истиот период во 2019 и 2018 година извозот е зголемен за 19% односно за 51%. Инаку извозот само во април е приближно на исто ниво како во март, додека увозот е зголемен за 5% споредено со претходниот месец годинава. Вкупниот увоз во првите четири месеци од годинава достигна речиси 1 милијарда евра што е за 75% повеќе од 2020 година, односно за 13% повеќе од 2019 и 55% повеќе од 2018. Анализата во април покажува и зголемен увоз од речиси 2% наспроти извозот што се должи на складирање залихи кај компаниите. Вкупниот нето извоз заклучно со април е над 10%.Анализата покажува и дека околу 70% од компаниите имаат пораст во извозот во април годинава однос на април 2021.Раст од речиси 4% има и кај бројот на вработени во април годинава споредено со истиот период лани. Во зоните во моментов работат над 14.500 наши сограѓани.Исто така првичната годишна анализа за 2021 година покажа дека просечната плата во технолошко – индустриските развојни зони за првпат е над државниот просек и тоа за 3%, што се должи и на зголемениот број на вработени кој во 2021 година е за 5% повисок од 2020. Се очекува ваквиот тренд да продолжи и годинава со реализација на новите странски инвестиции во Зоните.

Македонија | пред 3 години

Над 40 милиони евра влегуваат во државниот буџет од ТИРЗ

Компаниите во Технолошко индустриските развојни зони оствариле највисоко ниво на приходи, а уплатиле најмалку 3 пати повеќе од тоа што го добиваат од буџетот на државата, покажа годишната анализа на ТИРЗ за 2021 година. Вкупното ниво на приходи достигнало над 156 милијарди денари што е за 15,6% повеќе од 2020, и за 5% од претпандемиското ниво.„Според овие бројки можеме да констатираме дека економијата особено во Зоните, успешно ја надмина корона кризата, но и глобалната криза во снабдување со микрочипови како и првичните негативни ефекти од енергетската криза. Охрабрува тоа што и покрај глобалните случувања кои влијаат врз економијата, компаниите продолжуваат да растат,“ посочи Јован Деспотовски, директор на ТИРЗ презентирајќи ја годишната анализа.Компаниите во ТИРЗ лани оствариле вкупна добивка која надминува 100 милиони евра, што е за речиси 11% повисока од претходната 2020 година.Презентирајќи ја годишната анализа за економските активности во зоните, Деспотовски информира дека вкупно исплатената државна помош за ТИРЗ лани била речиси 732 милиони денари, додека вкупните уплати од компаниите во Буџетот само по основ на данок на плати и надоместоци, како и социјални осигурување изнесувале речиси 2 милијарди денари. Според првичните анализи се очекува во државниот буџет да се слеат уште дополнителни 400 милиони денари од данок на добивка.„Државата по овие основи инкасира над 40 милиони евра уплати во буџетот од страна на компаниите во Зоните што е за речиси 12 милиони евра повисоко од 2018 година. Ова значи повеќе пари во буџетот за нашите сограѓани, за нови училишта, болници, патишта. Очекувам и заради позитивните трендови кои веќе ги имаме во првиот квартал од годинава дека ова ниво на приходи во државната каса ќе продолжи да расте и понатаму,“ рече Деспотовски.Регистриран е и пораст од околу 20% на исплатена државна помош што заедно со растот на активата е индикатор дека компаниите се во интензивен инвестициски циклус бидејќи исплатата на државната помош е врзана со реализирани инвестициски активности.Според Деспотовски особено е важен нето ефектот од уплатата и исплатата во буџетот.„ Соодносот на уплатите од компаниите и исплатите од буџетот покажува дека компаниите во зоните уплаќаат од 2,7 пати до 5 пати повеќе од тоа што го добиваат од буџетот. Не се расфрламе со парите на граѓаните, туку со домаќински пристап и посебни мерки заедно со компаниите креираме поволна бизнис инвестициска клима и се грижиме бенефитите да бидат еднакви за сите,“ рече Деспотовски и додаде дека очекува овие позитивни трендови и покрај глобалните случувања и економска криза, да продолжат и годинава.Анализата покажа и дека просечната плата во технолошко – индустриските развојни зони за првпат е над државниот просек и тоа за 3%, што се должи и на зголемениот број на вработени кој во 2021 година е за 5% повисок од 2020.

Македонија | пред 3 години