Токсичниот облак што се создаде по големиот пожар во близина на Солун се прошири кон јужните делови на Грција и стигна до Пелопонез, поради што надлежните служби издадоа предупредувања до населението, особено до ранливите категории граѓани.
Пожарот избувна во саботата вечерта во областа Ореокастро, во близина на Солун, а огнот зафати индустриски објекти, меѓу кои фабрика за рециклирање и текстилни капацитети. Поради согорувањето на пластика и други индустриски материјали, над градот се формира густ токсичен чад кој, поттикнат од силните ветрови, се прошири на стотици километри.
Во Солун беше спроведена делумна евакуација на неколку населби, а преку системот за итни предупредувања 112, граѓаните беа повикани да останат во затворени простории и да ги држат прозорците затворени.
Иако засега нема наредба за евакуација во Пелопонез, локалните власти препорачуваат децата, постарите лица и хронично болните да избегнуваат престој на отворено поради можното влошување на квалитетот на воздухот. Во тек е континуиран мониторинг на загадувањето, а неговиот интензитет ќе зависи од движењето на воздушните струи.
Грчките власти соопштија дека поради сомнение дека поради невнимание го предизвикал пожарот е приведен 76-годишен маж. Според истрагата, огнот започнал покрај пат, а потоа брзо се проширил кон индустриската зона, каде што дополнително се разгорел поради запаливите материјали.
Во гаснењето на пожарот учествуваат повеќе од 160 пожарникари со десетици противпожарни возила, воздушна поддршка и специјализирани тимови, додека интервенцијата дополнително ја отежнуваат експлозии во зафатените индустриски објекти.
