Силно невреме ја зафати Централна Европа, носејќи поројни дождови, град, силен ветер, поплави и големи проблеми во сообраќајот во Словенија, Австрија и јужните делови на Германија.
Во Словенија е прогласено портокалово предупредување за целата земја, а локално веќе е регистриран град во повеќе населени места. Метеоролозите предупредуваат дека во текот на денот и ноќта се очекуваат нови силни бури, проследени со обилни врнежи, грмежи и силни налети на ветер.
Во Австрија, за делови од земјата е издадено највисоко ниво на предупредување поради опасност од интензивни врнежи, град и силни ветрови. Невремето стави крај на топлотниот бран што ја зафати земјата во изминатите денови.
Обилните дождови предизвикаа стотици интервенции и во германската покраина Баварија. Поплавени се подруми и улици, урнати се дрвја, а привремено беа нарушени авионскиот и железничкиот сообраќај. Над Боденското Езеро беше забележана и водена пијавица.
Невремето однесе и човечки животи. Во Австрија загина 26-годишен возач на квад врз кого паднала гранка, додека во Романија едно лице беше пронајдено мртво во автомобил врз кој паднало дрво.
Метеоролошките служби предупредуваат дека во делови од регионот и во наредните часови се можни нови локални невремиња, проследени со силен дожд, град и ветер.
