Министерот за внатрешни работи Панче Тошковски ја преживеа и третата интерпелација во изминатите две години, откако Собранието не ја поддржа иницијативата за негова политичка одговорност поднесена од Левица.
По неколкучасовна расправа, за смена на Тошковски гласаа 19 пратеници од опозицијата, што не беше доволно за интерпелацијата да биде изгласана.
Во текот на расправата, лидерот на Левица, Димитар Апасиев, упати низа обвинувања кон министерот, посочувајќи дека МВР е политизирано и партизирано, дека има слабости во борбата против криминалот, како и дека постојат партиски влијанија во институцијата.
Апасиев го обвини Тошковски и за, како што рече, поставување на лица блиски до владејачката партија на одредени позиции во Министерството.
„Наместо да ги тргнете оние што не одговарале, вие ги ставате во општински изборни штабови на ВМРО-ДПМНЕ. До каде оди оваа перверзија“, рече Апасиев од собраниската говорница.
Тошковски возврати дека станува збор за политички мотивирани обвинувања и оцени дека опозицијата се служи со манипулации и невистини.
„Ви благодарам за сето она што го наклеветивте, излажавте и изманипулиравте. Ти благодарам, драг мој сограѓанину Димче Апасиев, за сите лични напади што ги направи. Македонските граѓани успеаја да видат каков лидер на дел од опозицијата имаме во оваа држава“, изјави Тошковски.
Во расправата се вклучија и пратеници од СДСМ, кои оценија дека Министерството за внатрешни работи не покажува доволна ефикасност во справувањето со криминалот.
Пратеничката Јована Тренчевска посочи дека има голем број нерасветлени убиства, како и зголемен број случаи на семејно насилство и фемициди.
Од редовите на ВМРО-ДПМНЕ, пак, возвратија дека состојбите во МВР се подобрени во однос на претходниот период, потсетувајќи на проблемите со издавањето пасоши во времето на претходната власт.
Иако интерпелациските седници можат да траат до полноќ, расправата заврши по околу пет часа, по што претседателот на Собранието Африм Гаши ја стави интерпелацијата на гласање. Со тоа, Тошковски останува на чело на Министерството за внатрешни работи.
