Министерот за внатрешни работи Панче Тошковски ја преживеа и третата интерпелација поднесена против него во Собранието.
На седницата, која сè уште е во тек, 58 пратеници гласаа против неговата смена, додека 19 пратеници ја поддржаа интерпелацијата.
Интерпелацијата ја поднесе Левица, обвинувајќи го министерот за селективно постапување, непрофесионално работење и политичко влијание во Министерството за внатрешни работи. Тошковски ги отфрли обвинувањата, оценувајќи дека станува збор за политички мотивиран обид за попречување на борбата против криминалот и корупцијата.
Лидерот на Левица, Димитар Апасиев, во своето обраќање оцени дека Тошковски, кој повеќе од две години раководи со Министерството за внатрешни работи, наместо да воспостави ред во институцијата, ја претворил во „фамилијарна тезга“, во која блиски лица и роднини добивале унапредувања и привилегии.
Апасиев го обвини министерот и за толерирање на корупцијата и криминалот во полициските редови, посочувајќи дека во изминатите години стотици полициски службеници биле предмет на кривични постапки.
