Траект со 1.246 патници остана без струја и се насука кај грчкиот остров Милос

Грчките власти започнаа истрага за причините поради кои патничкиот траект „Кисамос“ останал без електрична енергија и се насукал кратко по испловувањето од островот Милос во раните утрински часови во саботата.

— реклама —

Траектот на компанијата АНЕК, кој пловел на релацијата Пиреја – Суда, превезувал 1.246 патници и 108 членови на екипажот. Околу 3:10 часот, непосредно по напуштањето на Милос и при северен ветер со јачина од пет до шест степени според Бофоровата скала, на бродот дошло до целосен прекин на електричното напојување.

Поради дефектот, траектот се насукал во плитки води.

— реклама —

По подводен преглед што го извршил нуркач, бродот успеал самостојно да се ослободи и безбедно да се врати во пристаништето Милос, придружуван од патролен брод на грчката крајбрежна стража.

— реклама —

Во инцидентот нема повредени патници или членови на екипажот, а надлежните соопштија дека не е забележано загадување на морето ниту навлегување вода во бродот.

Пристанишната управа на Милос му забрани понатамошно испловување на траектот сè додека не завршат инспекциите и не се утврдат причините за електричниот дефект и насукувањето.

Од компанијата АНЕК соопштија дека по испловувањето од Милос настанал „технички дефект“, кој бил отстранет од машинскиот екипаж, по што бродот безбедно се вратил во пристаништето, каде што останува до завршување на проверките од надлежните институции.