75-годишна туристка од Македонија вчера попладне го загубила животот на плажа во близина на местото Неа Каликратија, на првиот крак од полуостровот Халкидики, објавија грчките медиуми.
Жената била извлечена од морето во тешка состојба, по што на местото веднаш била повикана итна медицинска помош. Таа била пренесена во болницата во Неа Мудања, каде лекарите констатирале смрт.
За случајот е отворена предистражна постапка што ја води Второто пристанишно одделение во Неа Мудања, во рамки на Централната пристанишна управа во Солун.
Надлежните органи наредиле да се изврши обдукција и судско-медицинско вештачење на телото во Службата за судска медицина во Солун, со цел да се утврдат точните причини за смртта.
