Две лица загинаа во шумски пожар што зафати куќа во шумска населба во северниот дел на Грција, соопштија грчките власти.
Пожарот избувнал во вторникот попладне во ниска вегетација, а поради силниот ветер за кратко време се проширил и зафатил куќа во близина на селото Лити, на околу 25 километри од Солун.
При интервенцијата, пожарникарите пронашле тело на маж во близина на куќата, додека второто тело било откриено во самиот објект. Од истото подрачје била спасена жена, која се здобила со изгореници.
Претходно, надлежните служби упатиле повик до жителите да се евакуираат и да се упатат кон блискиот спортски терен, каде што бил обезбеден безбеден простор.
Научниците предупредуваат дека Грција, како и другите медитерански земји, е сè почесто погодена од разорни шумски пожари, поттикнати од климатските промени, високите температури и долгите сушни периоди, кои ја зголемуваат опасноста од брзо ширење на огнот.
