Трагедија во Италија: Почина 11-годишно девојче, косата ѝ се заглавила во одвод на базен

Единаесетгодишно девојче почина во болница два дена откако нејзината коса се заглави во одводниот систем на базен во италијанскиот град Сестри Леванте. Италијанското обвинителство отвори истрага за сомнение за убиство од небрежност.

Несреќата се случила во вторникот попладне во помал хидромасажен базен на едно капалиште. Девојчето, кое со семејството со години летувало во овој дел од Италија, во еден момент останало заробено под вода откако усисниот систем ја повлекол нејзината коса.

— реклама —

Друго дете прво ја забележало под водата, мислејќи дека нурка, но кога сфатило дека нешто не е во ред, ги повикало возрасните.

— реклама —

Сопственикот на капалиштето се обидел да ја ослободи, пресекувајќи ѝ ја косата со нож, по што била повикана итна медицинска помош. Медицинските екипи веднаш започнале реанимација, но девојчето не давало знаци на живот. Со хеликоптер било пренесено во детската болница во Џенова, каде што било сместено на Одделот за интензивна нега. И покрај напорите на лекарите, починало во четвртокот навечер.

Обвинителството нареди обдукција, а семејството дало согласност за донирање органи по завршувањето на постапката.

— реклама —

Истрагата треба да утврди дали биле прекршени безбедносните прописи. Според првичните информации, на капалиштето немало истакнато предупредување дека на деца помлади од 12 години не им е дозволено да го користат базенот без надзор. Базенот, кој е длабок еден метар, е запечатен за потребите на истрагата.

По трагедијата, италијанскиот министер за цивилна заштита Нело Мусумечи најави подготовка на нов закон за зголемување на безбедноста на базените.

„Во последните три месеци во базени животот го загубија пет малолетници. Потребни се построги правила, но и поголема внимателност, за децата никогаш да не остануваат сами во вода“, изјави министерот.