Американскиот претседател Доналд Трамп во новиот предлог-буџет бара од Конгресот 152 милиони долари за повторно отворање на озлогласениот затвор Алкатраз, јавува германската агенција dpa.
Предлог-буџетот за фискалната 2027 година, кој Белата куќа го објави доцна во петокот, предвидува средства за обнова на Алкатраз како „врвен и безбеден затворски објект“.
Средствата би ги покриле трошоците за првата година од проектот и се дел од пошироко барање од 1,7 милијарди долари за финансирање на „затвори кои се распаѓаат“ во САД.
Трамп уште минатиот мај изјави дека им дал наредба на надлежните власти да го обноват и повторно да го отворат затворот.
Познат како „Карпата“, Алкатраз бил еден од најстрого чуваните затвори, сместен на остров во заливот на Сан Франциско.
Островот 29 години служел како место за најопасните криминалци, а последните затвореници биле ослободени во 1963 година.
Се сметало дека бегство од Алкатраз е невозможно, а меѓу најпознатите затвореници биле Ал Капоне, Џорџ „Машин Ган“ Кели, Алвин „Крипи“ Карпис, Роберт Страуд.
Затворот почнал со работа во 1934 година, а во него казна издржувале вкупно 1.576 лица.
Денес, Алкатраз е музеј и туристичка атракција, кој годишно го посетуваат околу 1,2 милиони луѓе.
