Американскиот претседател Доналд Трамп денес ќе разговара со рускиот претседател Владимир Путин за мирот во Украина, додека европските лидери бараат Кремљ да прифати итен прекин на огнот за да се стави крај на најсмртоносниот конфликт во регионот од Втората светска војна.
Путин испрати илјадници војници во Украина во февруари 2022 година, предизвикувајќи ја најсериозната конфронтација меѓу Русија и Западот од Кубанската ракетна криза во 1962 година.
Трамп, кој вели дека сака да биде запаметен како миротворец, постојано повикува на прекин на „крвопролевањето“ во Украина, кое неговата администрација го прикажува како посредничка војна меѓу САД и Русија.
Под притисок на Трамп, претставниците од завојуваните земји се состанаа во Истанбул минатата недела за прв пат од март 2022 година, откако Путин предложи директни разговори, а Европејците и Украина повикаа на итен прекин на огнот.
„Темите на повикот ќе бидат запирање на „крвопролевањето“, кое убива просечно повеќе од 5.000 руски и украински војници неделно, и трговија“, напиша Трамп на својата веб-страница Truth Social.
„Се надевам дека ќе биде продуктивен ден, дека ќе се постигне прекин на огнот и дека оваа многу насилна војна, војна што никогаш не требаше да се случи, ќе заврши.“
Трамп, кој рече дека напредокот во прекинот на огнот е малку веројатен додека не се сретнат тој и Путин, рече дека ќе разговара со Путин во понеделник во 16 часот. Кремљ соопшти дека подготовките за повикот се во тек.
Трамп, чија администрација јасно стави до знаење дека Русија може да се соочи со дополнителни санкции ако не ги сфати сериозно мировните преговори, рече дека ќе разговара и со украинскиот претседател Володимир Зеленски и разни членки на НАТО.
Путин, чии сили контролираат една петтина од Украина и напредуваат, цврсто стои на своите услови за завршување на војната, и покрај јавниот и приватниот притисок од Трамп и повторените предупредувања од европските сили.
Во неделата, Русија го започна својот најголем напад со беспилотни летала врз Украина од почетокот на војната. Украинското разузнавање соопшти дека верува и дека Москва има намера да лансира интерконтинентална балистичка ракета во недела, иако немаше потврда од Русија.
