Трамп ги демантираше наводите за недостиг на муниција и најави кривичен прогон

Американскиот претседател Доналд Трамп ги отфрли медиумските извештаи дека Пентагон се соочува со намалени резерви на оружје и муниција, оценувајќи дека лицата кои откриваат доверливи информации вршат предавство и треба кривично да одговараат.

Во објава на својата социјална мрежа Truth Social, Трамп порача дека Соединетите Американски Држави располагаат со „огромни количини муниција, особено од одредени видови“.

— реклама —

Тој додаде дека производството на нови количества се одвива континуирано и според потребите, нагласувајќи дека американската одбранбена индустрија гради најголем број нови производствени капацитети во својата историја.

— реклама —

Истовремено, Трамп остро ги нападна изворите на медиумските информации за наводен недостиг на оружје.

„Во тек е потрага по оние што ги откриваат овие предавнички информации“, напиша Трамп, додавајќи дека за одговорните ќе бидат побарани долготрајни затворски казни.

— реклама —

Претходно, „Вашингтон пост“ објави дека Трамп наводно остро го критикувал министерот за одбрана Пит Хегсет поради исцрпените резерви на клучна муниција, што, според весникот, ги ограничува американските воени опции во евентуален конфликт со Иран.

Според истиот извештај, Трамп на состанок на кабинетот побарал објаснување од Хегсет зошто проблемот со залихите не бил решен, иако верувал дека тоа веќе е направено.

Извори на весникот тврдат дека најголем недостиг има кај наведуваните ракети со долг дострел и ракетите за противвоздушна одбрана, поради што Трамп во последните денови наводно се откажал од нови големи воени напади врз Иран.