Трамп го пофали Си во Пекинг: Ти си одличен лидер, тоа им го кажувам на сите

Доналд Трамп се сретна во Пекинг со Си Џинпинг и во воведното обраќање упати низа пофалби кон кинескиот лидер и односите меѓу двете држави.

„САД и Кина имаат фантастичен однос. Кога и да сме имале проблем, луѓето тоа не го знаат, но многу брзо сме го решавале. Пред нас е фантастична заедничка иднина“, изјавил Трамп.

— реклама —

Американскиот претседател му порачал на Си дека има огромна почит кон Кина и кон неговата работа.

„Вие сте голем лидер, тоа им го кажувам на сите. Понекогаш луѓето не сакаат кога го кажувам тоа, но јас сепак го кажувам бидејќи е вистина. Секогаш ја кажувам вистината“, рекол Трамп.

— реклама —

Тој додал дека во Пекинг ги донел, како што рекол, „најголемите и најдобрите бизнисмени во светот“.

„Не сакав втори или трети луѓе во компаниите. Ги сакав само тие што се на врвот. Денес се тука за да покажат почит кон вас и кон Кина“, изјавил американскиот претседател.

Трамп нагласил дека американските бизнисмени се радуваат на трговија и соработка со Кина, но потенцирал дека односите ќе бидат „целосно реципрочни“ од американска страна.

— реклама —

„Некои велат дека ова можеби е најголемиот самит досега. Не можам да се сетам на нешто слично. Во САД луѓето не зборуваат за ништо друго“, рекол Трамп.

Средбата меѓу двајцата лидери се одржува во момент кога САД и Кина се обидуваат да ги стабилизираат односите оптоварени со трговските спорови, царините, технологијата, прашањето за Тајван и војната со Иран.

— реклама —

Посетата на Трамп на Кина претходно беше одложена поради конфликтот со Иран и американскиот притисок врз Пекинг да помогне во обезбедувањето на Ормутскиот Теснец, клучен поморски правец за глобалната трговија со енергенси.