Американскиот претседател Доналд Трамп остро го критикувал израелскиот премиер Бенјамин Нетанјаху по израелските напади врз позиции на Хезболах во Бејрут, само неколку часа пред очекуваното потпишување на договорот за прекин на непријателствата меѓу САД и Иран.
Според извор запознаен со ситуацијата, Трамп и Нетанјаху телефонски разговарале по нападите, а американскиот претседател претходно јавно изразил незадоволство од израелските потези.
„Израел повеќе не би смеел да изведува напади никаде во Либан, но исто така ниту другите страни, вклучително и Хезболах, не би смееле да го напаѓаат Израел“, изјавил Трамп.
На својата социјална мрежа Truth Social, тој порача дека нападите не требало да се случат токму во момент кога двете страни се толку блиску до мировен договор со Иран.
„Ова може да биде почеток на долг и убав мир – да не го уништиме“, напиша Трамп.
Во разговор за израелскиот Канал 12, американскиот претседател употребил и многу поостар тон кон Нетанјаху.
„Биби нема никаква дискреција“, рекол Трамп, додавајќи дека директно му пренел на израелскиот премиер дека нападот бил непотребен.
„Хезболах пукаше и ништо не погоди. Никој не беше повреден. И тогаш тој мораше да тргне во напад, и тоа во Бејрут. Тоа многу ме налути“, изјавил Трамп.
Од друга страна, израелските власти соопштија дека нападите биле одговор на претходен оган од Хезболах кон израелска територија. Во заедничко соопштение, премиерот Нетанјаху и министерот за одбрана Израел Кац порачаа дека Израел нема да толерира напади врз својата територија.
Израелската армија наведе дека цел на нападите бил команден центар на Хезболах во јужниот дел на Бејрут, кој, според нив, бил користен за планирање напади врз израелски граѓани и војници.
Во меѓувреме, висок ирански функционер и советник на врховниот лидер предупреди дека Техеран нема да прави никакви отстапки кога станува збор за одбраната на Либан и порача дека секој што ќе ги премине иранските „црвени линии“ ќе се соочи со последици за кои ќе зажали.
