Трамп и Нетанјаху на средба во Белата куќа: Во фокусот Иран и можната ескалација на конфликтот

Израелскиот премиер Бенјамин Нетанјаху денеска ќе се сретне со американскиот претседател Доналд Трамп во Белата куќа, за првпат откако САД и Израел во февруари започнаа воени напади врз Иран.

— реклама —

Средбата се одржува во време кога дел од најблиските сојузници на Трамп изразуваат загриженост дека Нетанјаху би можел да се обиде да го убеди американскиот претседател да ја интензивира воената кампања против Иран.

— реклама —

Според американските медиуми, токму на нивната последна средба во Белата куќа Нетанјаху успеал да добие поддршка од Трамп за почеток на воената операција против Техеран. Поради тоа, дел од републиканците блиски до движењето „Америка на прво место“ стравуваат дека денешната средба може да отвори пат за нова ескалација на конфликтот.

Во меѓувреме, Вашингтон се обидува да воспостави рамнотежа меѓу дипломатските напори и можноста за нови воени операции. Иако САД и Иран викендов ги прекинаа меѓусебните напади со надеж дека ќе се постигне нов прекин на огнот, Трамп повторно предупреди дека ќе следуваат нови американски напади доколку пропаднат дипломатските разговори.

— реклама —

Според најавите од Белата куќа, Трамп и Нетанјаху ќе разговараат за војната со Иран, безбедносната состојба на Блискиот Исток, трилатералниот договор меѓу САД, Израел и Либан, како и за можноста за проширување на Аврамовите договори.

— реклама —

Во САД, во меѓувреме, расте политичкиот притисок врз администрацијата на Трамп да избегне долготрајно воено вклучување на Блискиот Исток, особено пред претстојните избори за Конгресот. Дел од републиканските функционери сметаат дека продолжувањето на конфликтот би можело да има сериозни политички и економски последици за земјата.